Гьарца шинах, аьдатравун дагьсса куццуй, мартрал 21-нний Ваччиял шяраву лахъа-хъунну кIицI лагай Интнил хьхьу. Байрандалущал жямат барча буллалисса ихтилат бунни Ккуллал райондалул администрациялул бакIчинал хъиривчу Анатолий Давдиевлул.
Буттал буттахъая шихуннай нанисса жула байраннугу, аьдат-эбадатругу щархъай лавайсса даражалий дуручлай бушиврул барашинна дунни ва байрандалул. Интнил хьхьу хьунадакьин цачIун бавтIун бия райондалул шяраваллавасса фольклордал коллективрду. Бакъахьунссия шяраву цавагу кулпат шикку гъирарай гьурттушинна къадурсса.
Байрандалийн ларсун бувкIун бия цаннияр ца аьнтIикIасса бартри. ОьрчIал кIунттихьсса гьарица бартлул буслай бия цуксса дакI дирхьуну дурну дуссарив. Бургъи-зурул лишанная, жанавартрал къалипирттая байбивхьуну, шикку дакъасса журалул барта дакъая, куннаяр кув ялтту буккан хIарачат бувну бия нитти-буттал. ТIивтIуну бия хьхьахьхьари, щайини, ккурч, бакъухъ, кIарттул ччатI, дукьрахIан дусса авадансса ссупра. Муданма кунма, ва ххуллухьгу балай тIий, къавтIий, мажлис чIюлу бунни культуралул зузалтрал.
Интнил хьхьунил сий гьаз дурна Цалчинмур ЦIувкIуллал шяравасса машгьурсса пагьламан Камил Маммаевлул. Ванал, паргалну хьхьуттайх лахълай, хIайран бунни тамашачитал.
Хъирив байрандалуцIун дархIусса дуаьрду ккалай, балайрду тIий, къавтIавуртту дуллай, жяматрал дакIру таза дуккан дунни.
Имара Саидова
