ЧIявусса илгу тамашалийн бувкIун, хъуннасса сийлий шай гьарцагу шинал Лакрал театрданул Интнил хьхьунин хас дурсса концертру, хъинну яргсса, авадансса дикIай мунил программа: аьдатрацIун бавхIусса балайрду, аслийсса халкьуннал балайрду, тIуркIурду, къавтIавуртту.
Цаппарасса шиннардил хьхьичI «Интнил хьхьунил» проект лайкь хьуссар Аьрасатнал Театрал ишккаккултрал союзрал сакин бувсса «Грани театра масс» тIисса щалагу Аьрасатнал конкурсрал дипломран «Лучший национальный праздник» номинациялий.
Дунияллий хъанахъимуниясса хавардая шацI шаврил чаннасса ва ххарисса асардах мякь бувксса тамашачитуран дакIнинсса малхIанну хьунни ва базилухьсса Интнил хьхьунил байрангу.
Циван ххирар агьалинан Лакрал театрданул программардаву ляличIину «Интнил хьхьунил» программа чирча, му так хъярч-махсарарттал, тIуркIурдал, балайрдал ва къавтIавурттал авадансса душивруцIун, агьалинан дакIнин дутай хъамадитала хъанахъисса аьдатру, европанал ва аьрабнал модалул жула оьрмулува дуккан дурну ларгсса миллатрал лаххия. Исвагьину даркьуну дия жула артистътурай чиллу-чухъри, бузмарду, чалагъайртту ва хара-лачакру, миннул, лархминнал журат ххуй дуллай, цIу-цIанпIир ххи буллай бия.
Лакрал театрданул проектирдай гьуртту хьун гъирарай бучIай цIанихсса балайчиталгу, сахIналийн дахьва буклакисса балайчиталгу. «Интнил хьхьунил» программалул муданмасса хъамалли тамашачитурангу ххирасса Загьидат Муслимова, Карин ва Диана Кьадинаевхъул. Гьуртту хьунни ва базилухь Дагъусттаннал халкьуннал артистътал: Лариса ХIажиева, Таибат Къаллаева, Аьбдулла МахIаммадмирзаев.
Программалий гьурттуну бия театрданул сайки цинявппа артистътал ва балетрал труппа. МиннацIун сахIналийн бувккун, миллатрал лаххиялуву балайрдахун къавтIий, концертрал сий хъун дан цащава бюхъайссаксса хIарачат буллай бия артистътурал оьрчIругу. Вайнна Ислам ва Рукьижат МахIаммадовхъал, МахIаммад Амировлул аьнтIикIахъул. Ца даркьуну дияча цайрагу миллатрал лаххия.
Концертрал яла яргмур номерну кIицI бавияв театрданул балетрал къавтIалтрал щаллу дурсса аслийсса лакку къавтIаву «Къирият», къуманал дакI аьч дуллалисса, гьавас бутлатисса. Постановщик Аьрасатнал лайкь хьусса артист Муса Оздоев. Дайдирхьуна концерт Арслан Шагьмардановлул интнихасса балайлул хорданий. Къуртал тIурча дуруна Лакку билаятрал гимну хьусса МухIуттин Чариновлул Лакку билаятрахасса балайлийну.
Муданна кунна, усттарну концерт дачин дурну бия Дагъусттаннал халкьуннал артистътал Шамсуттин Къапланов ва Саният Рамазанова.
Сайки шанна ссятрайсса концерт дайдирхьуну къуртал хьунцIа балайчитурахун руцлай бия цIанихсса музыкантътал: Арслан Шагьмарданов, ХIусайна ХIусайнаев (зюннав). ХIадур дурну дия концерт Аслан МахIаммадовлул ва Арслан Шагьмардановлул.
Зулайхат Тахакьаева
