Мартрал 12-нний Москавлив, Поклонная зун­ттуйсса «Рамазан зурул чятирдануву», аьдатрайн бувну, Да­гъусттаннал кьини дунни Аьрасатнал ПрезидентначIасса Дагъус­ттан республикалул Пост­предствалул.

Гьашинумур программа дар­хIуну дия Ватан дуруччул шин баян баврицIун. БавтIминнавух бия СВО-лий гьуртту хъанахъимигу, вайннал кулпатругу.
Мероприятие дайдирхьуна Троицк шагьрулул имам Умар-Хазрат Аьлиевлул Кьурандалул аятру буккаврия. Постпреднал хъиривчу Табир Маликовлул бувккуна постпред Владислав Толстюклул цIанияту барча буллалисса чагъар.

Дагъусттаннал Бусурманнал рувхIаний управлениялул цIанияту махъ лавхъуна МахIачкъалаллал Имамтурал советрал председатель Аьбдулла Ахаловлул. Ванал кIицI лавгуна, дин дусса, иман цIакьсса инсаннан буттал аьрщигу, ни­ттил мазгу хьхьичIунну бикIан аьркиншиву ва буттал улклул бучIантIимунил буруккинттарай икIайшиву. Динну, миллатру личIи къабуллай, чил культуралулгу хIурмат буну къуццу тIун аьркиншиву. Ифтарданийн бавтIцириннахь бувсуна Дагъус­ттанная, хъуннасса Ххувшаву ласавриву Дагъусттанналгу бутIа бивхьушиврия.

Балжину бувсуна Совет Союзрал кIийла Виричу АхIмад-Хан Султаннул оьрмулул ххуллия ва гьунардая. Ихтилатирттал лях-карах уссурвал МухIаммад ва Зикрулла Оьма­ровхъал нашидру увкуна. Мероприятиялул ахирданий Буттал кIанттул цIанийсса Хъун дяъвилул тарих цукун кIулну бурив ххал буллалисса викторина дурна. Ифтарданий, мудан кунма, мадарасса лакгу гьуртту хьунни. Вайнналгу кIицI лавгунни, гьар шинах гъирарай бучIайшиву жулва миллат­рал агьлугу ккаккан, диндалул вакилтурал мюнпатсса ихтилатирттах вичIигу дишин.
ПатIимат Рамазанова