Февральданул 4-нний МахIачкъалалив, Зайнулла Шарифлул цIанийсса мизитраву, лакрал миллатрал цашиву ккаккан дуллалисса ва рувхIанийсса ирс-ххазина буруччаврин хас бувсса мажлис хьунни.
Аьлимтурал вяъзардах ва политиктурал аькьилсса маслихIатирттах вичIидишин бавтIуна имандалий оьрму бутлатисса ва бутлан ччисса, исламрал кIулшивуртту куртIгу, цIакьгу дуван гъира бусса чиваркI ва хъами (хъами мизитрал 2-мур зивулий).
Ва даврил сиптачиталгу, сакиншинначиталгу бия лакрал районнал диндалул идарарттал вакилтал, имамтурая ва миннал кумагчитурая тIайла хьуну.
Аьдатрайн бувну, мажлис байбивхьуна Кьурандалул аятру дуккаврия. Хъамаллуравух бия МахIачкъалаливсса имам Шамиллул цIанийсса мизитрал имам МухIаммад Сулайманов хIаласса бусравсса динчиталгу, жяматийсса ишккаккултгу.
Мажлисрай исламрал диндалул ххуллу-ххуттай цIакьну бацIан аьркиншиврия, чIаравминнай рахIму-цIими буван, хъуниминнаха хIурмат буван аьркиншиврия, ппухълунная ирсирай бивсса рувхIанийсса ххазинарттал кьимат лавайну бикIан аьркиншиврия бюххансса ихтилатру бувна Лакрал райондалул имам ХIабиб Батталовлул, Ккуллал райондалул имам КьурамухIаммад МахIаммадовлул, Лакрал райондалийсса «Ас-Салам» кказитрал вакил ва КIундиннал шяраваллил имам АьлиасхIаб Массуевлул. МахIачкъала шагьрулул Депутатътурал Мажлисрал хъунама Марис Илиясовлул, Дагъусттаннал гуманитар институтрал цалчинма проректор Давуд Атаевлул, Европанал чемпион Шамил Амировлул, халкьуннан диндалул агьамшиву кIулну душиврий, ислам лахьхьавриву барачатшиву душиврий ва жагьилсса никирал ва оьрчIал тарбиялухгу дагьайкунсса къулагъас хъуниминнал дикIан аьркиншиврий чIурчIав дуллалисса мяъна-мурадрайсса ихтилатру бувна.
Мажлис бачин бувну ия Муфтиятрал ЮТО-лийсса полпред МухIаммад Майранов. Мажлисрай чIивимур хIажлийнсса путевкардал кIунурду буклакисса давугу дия, хIажлийн ачинсса тIайлабацIу хьуна Цалчинмур ЦIувкIратусса16 шинавусса МухIаммадаьлим Кьурбановлун. Ва Гуманитар-педагогический колледжраву дуклакисса, ЦIуминалийсса «Инсан» фондрал давурттаву чялишну гьуртту хъанахъисса волонтер ур.
«Вай укунсса мажлисру жулва жяматрал куннал куннащалсса дахIаву, дусшиву цIакь шаврин, жулва ппухълуннал рувхIанийсса ирс-ххазина буруччин кумагну хъанахъишиврий дакI дарцIуну бура. Жулва имамтурал хIарачатрайну лахъсса даражалий дурсса ва мероприятиягу лакрал куннал куннахсса ччаву хъиннура цIакь дувансса хьуннав, Аллагьнал жулла дакIурдиву Идавсихсса (с.аь.в.) ччавугу куртI дуваннав, Мунал (с.аь.в.) ккаккан бувсса ххуллийх бачин каши дулуннав, ва, яла -яла, дунияллийн паракьатшиву дагьаннав», – тIий бур Цалчинмур ЦIувкIуллал диндалул ссурваврал ккурандалул хъунмур ПатIимат Зиркьуева.
ПатIимат Рамазанова
