Вай гьантрай МахIач­къалалив «Love-Time» кафелуву хьунни гастрономиялул рекорд дихьлахьисса лахъа-хъунсса даражалийсса мажлис.

Кафелул цIигьурттурал мукьра ссятрал мутталий шавхьун бия 10 005 мюрщи бургер. Шанна-мукьра къат дурну бургердая дурну дия хъуннасса къюкIлил сурат. ИхIсандалул акциялул лагрулий дуллалисса мероприятие хас дурну дия Аьрасатнал Халкьуннал цашиврул шинан. Рекорд хIисавравун ласун оьвкуну бия «Рекорды страны и мира» тIисса дунияллул халкьуннал патриот проектрал хъунама судья Алик Бамматовлуйн. ИхIсандалул акциялул сиптачину ва сакиншинначину бувккунни кафелул хъунмур Маисат Шабанова. Ванил бувсунни, халкьуннал дусшиврул ва цашиврул лишанну хъанахъисса къюкIлил лишандалийсса цинярдагу мюрщи бургерду оьрчIал идарарттайх ва социал центрдайх дачIинсса ниятрай дуршиву.
Ва кьинисса мажлисрай гьуртту хьун оьвкуну бия МахIачкъала шагьрулул Мажлисрал председатель Хиби Аьлиевлуйн, Дагъусттаннал региондалийсса Аьрасатнал ЯтIул Ххачлил отделениялул председатель Раиса Шахсиновайн, ДР-лул Халкьуннал Мажлисрал депутатътурайн, министерстварттал ва ведомстварттал вакилтурайн. Мукунма мероприятиялий гьуртту хьунни Дунияллул халкьуннал Блогертурал ассоциациялул президент Нианила Бамматова ва Москавлиясса блогертал – миллионниктал. Шадлугърай гьуртту хьусса бусравсса хъамаллурал вайннал дурсса даврин лавайсса кьиматру бишлашисса ихтилатру бувна. Чирилул давривух чялишсса гьурттушинна даврихлу «Чистое сердце» ихIсандалул фондрал вице-президент Мисиду Садруттиновал барчаллагь увкуна Маисат Шабановахь ва ванил коллективрахь.
Мюрщи бургердал рекорд дирхьушиву тасттикь бувну махъ кафелул зузалт ва цинявппагу хъамал лавгуна «Забота» тIисса оьрмулул бугьараминнаха ва мушакъатминнаха къуллугъ буллалисса центрданийн ва У.М. Муртазаьлиевал цIанийсса идаралийн бургерду лавсун.
Ва ххаллилсса акциялул сиптачину бувксса Маисат Шабанова, ванил коллектив ва бусравсса хъамал хьунабавкьуна МахIачкъала шагьрулул мэр Жамбулат Салавовлул. Акциялул сакиншинначитуран лайкьсса кьиматгу бивщуну, шагьрулул мэрнал вайннащал бувна республикалий социал проектру ва туризмалул потенциал хьхьичIунмай баву мурадрайсса ихтилатру.
Маисат ва Ренат Шабановахъал кафе тIивтIуну бур 2009 шинал. Тания шинмай ва хъанай бур хъуниминнангу, мюрщиминнагу ххирасса кафердавасса ца. Мини-бургердал рекорд дишиннингу, Маисат Шабановал каялувшиндаралусса кафелул зузалтрал кIийлла дирхьуну дур дунияллул рекорд. Вайннал цалчин дирхьусса рекорд дур, 500 килограмм дусса роллырдая бувсса торт, мунияр хьхьичIгу бувну бивкIун бур мукунмасса 250 килограмм дусса, мукунмасса торт.
Имара Саидова