«Дагъусттан» РИА-лий хьунни гьашинусса хIажлил хIасиллу дуллалисса пресс-конференция.
Гьашинусса хIаж цукун лавгссарив, хIажлийн лавгми ци захIматшивурттащал хьунабавкьуссарив бувсуна Дагъусттан Республикалул миллатирттал политикалул ва диннал иширттал министр Энрик Муслимовлул ва «Марва-Тур» ООО-лул хъунама директор Булат Кьурбановлул.
Энрик Муслимовлул бусаврийн бувну, ларгсса шинал кунна, гьашинугу Саоьдуллал Аьрабусттаннал хIукуматрал Аьрасатнал Федерациялун ккаккан дурну диркIун дур 25 азара инсаннансса квота, ми дарчIуну дур Аьрасатнал субъектирттайх, ялапар хъанахъисса бусурманнал аьдад хIисав дурну.
– ХьхьичIунсса кIанттай, гьаршинах кунма, ва базилухьгу Дагъусттан бия. ЦIубутIуй жула республикалун ккаккан бувну бия мяйазарва кIану, яла тIурча, цайми регионнал цанна ккаккан дурсса квота харж къадурну духьувкун, ливчIсса кIанттурдугу ххи бувну бия жула республикалун. Мунийн бувну, гьашину Дагъусттанная хIажлийн лавгссар 10 170 инсан, – увкуна Энрик Муслимовлул.
КIицI лавгуна республикалий закондалий хIаж сакин бавриха зий душиву компания «Марва-Тур».
– ТIайлабацIу буну, хIажлийн лавгминнал чулуха шикаят бакъа хIаж сакин бавриха зузисса туроператортурал дянив «Марва-Тур» дуссар цалчинсса кIанай.
2022-ку шинал на навагу лавгссара хIажлийн, тийх хIажитуращал буллалисса ихтилатраву ттун щиячIав цукунчIавсса шикаят къабавуна, – увкуна ванал.
Мунийн бувну министрнал хIажлийн гьан ччиминнахь маслихIат бувна язи дугьан «Марва-Тур».
– «Марва-Тур» жула республикалий бувагу бусса ца операторди, Саоьдуллал Аьрабусттаннал хIукуматращал официальныйсса кьутIигу дурну, хIаж сакин бавриха зузисса, – увкуна ванал.
Мунил ялув Булат Кьурбановлул бувсуна так закондалийсса визалийхчил лавгманан дакъа къадулайсса душиву вай хIаллихшиннарду: яхьунсса кIану, медициналул страховка, транспорт, мюхчаншиву.
Виза дакъа хIажлийн лавгми цукунсса буруккинттащал хьунабакьайссарив жунма кIул хьунни гьашину. ХIарамзадасса туроператортурал хъяврин бувну, сайки урчIттуршуннийн бивсса Дагъусттанная хIаж бан лавгсса инсантал я яхьунсса кIану бакъа, я медициналул кумаг бакъа, я транспорт дакъа ливчIун бия.
– ХIажлийн наними биян бавриву захIматшивуртту хьунадакьлай дия. Саоьдуллал Аьрабусттан мукIру хьуна транспорт диялну итадакьин къабювхъуну бушиврий, виза дакъа бувкIми чIявусса бушиврийн бувну. Туристал хIисаврай, Саоьдуллал Аьрабусттаннайн бувкIун, хIаж байбишиннин аглан хьуну, яла тIурча, хIарачат буллай бия хIажлил эбадатру дансса чаранну лякъин. МуницIун бавхIуну ялунна чIалай диял хъанай дакъая транспорт, – увкуна «Марва-Турданул» каялувчинал.
КIилчинсса буруккин – Мина даралуву чятирду бивщусса шагьру, кIива миллион инсантурал цану лагайсса. Гиккугу, ккаккан бувссаннуяр чIявусса инсантал бушиву сававну, ттукI биял къахъанай, кондиционерду лешлай дия. КIиришиву духIан къахъанай, чIявусса хIажитал инжит хъанай бия.
– Аьмну цайми буруккинтту бакъая, жула чулуха хIаж буллалиминнан дузал бувну буссия самолетрайсса ххуллу, яхьунсса кIану, дукра.
Ларгсса шиннардих бурувгун, гьашинусса хIаж тIайлабацIу буну хьунни, – увкуна Булат Кьурбановлул.
ХIаж баврил багьа лахъ шаврил ялув Булат Кьурбановлул кIицI лавгуна яла агьаммур багьана: долларданул курс лахъ шаву, муницIун бавхIуну лахъ хъанай бушиву хIаллихшиннардал багьагу.
Зулайхат Тахакьаева
