На чичин ччай бура Кисловодскалий яхъанахъисса ГьунчIукьатIатусса ХIусайнова Фирузал кулпатрая.
Июль зурул дайдихьулий на лавгссияв хъамалу ФирузачIан, ванилгу нану тIий, ттунмагу шагьру ккаккан. Хъинну ххуйну кьамул бувна Фирузал, цилла чIунгу харж дурну, ттун шагьрулуву яла ххуйми кIанттурду ккаккан бувна. КIива гьантлий занай бивкIру Кисловодскалийх. Шагьругу ххуйсса бия, шиккусса лакгу хъиннува хIаласса, дакI-аьмал ххуйсса бия. Фируза яхъанай бур арсурвавращал ва вайннал кулпатирттащал. Хъинну бавкьусса кулпатру бур вайннал, хIурмат бусса, ххуйсса хъами бур Акмалуттиннул ва Муслиннул.
Фирузал на кIул бувунна цила чIаххуврай яхъанахъисса 2 хъамитайпалущал – Миясатлущал (Муся) ва Къисттаманнущал (Катя). Миясат — Гъумучатусса, Къисттаман – Ххутиятусса, тийхва бувсса, ччянияцIакул тиккува яхъанахъисса, хъинну дакIру ххуйсса, хIаласса хъами бия. Тай маркIачIанмай кьатIув мурхьирдалу чяй хIачIлай, дунияллул хаварду буслай бикIайва. Фирузалгу 50-хъайсса шинну хьуну дур Кисловодскалий, ва хъинну чIявусса инсантуран кIулну бия.
Хъунмасса барчаллагь вин, Фирузай, оьрмулул буччиннин битаннав, инава бувсса хIурмат Аллагьнал хьхьичI бацIаннав, оьрчIая, оьрчIал оьрчIая неъмат ккакканнав.
Ина мукун тарбия бувсса нитти-буттал бунагьирттал аьпа баннав. Аллагьнал ябаннав ина.
Сабират ТIагьирова
