Мартрал 13-нний ДР-лул энергетикалул ва тарифирттал министр Марат Шихаьлиевлул ва «Дагэнерголул» филиалданул чIумуйсса директор Арсен ХIажиевлул пресс-конференция хьунни.

Вайннал бувсунни, энергетикалул бутIувун жагьилсса, пагьму-гьунар бусса пишакартал кIункIу баншиврул, «Россети Северный Кавказ»-«Дагэнерго» дуллай бушиву «Энергия гор» тIисса кадрардал конкурс. «Дагэнерголул» даврил уртакь хьуну бур ДР-лул Энергетикалул ва тарифирттал министерство, ванил кабакьлай бур конкурсрай хьхьичIун ливчуминнан агьамми кIанттурдай къуллугърай бацIан.
ДР-лул энергетикалул министрнал бусаврийну, цIанасса ппур­ттуву республикалий биял хъанай бакъар энергетикалул бутIуву зунсса пишакартал. Аьркинну бур электросетирттал комплексрансса зузалт хIадур баврил даву цIусса ххуллийн дуккан дуван. Муния цимилагу бувсунни Республикалул бакIчи Сергей Меликовлулгу.
«Иширал тагьар хъин чулиннай даххана даву мурадрай, жу дайдишарду кадрардал конкурсрал программа «Энергия гор», – увкунни Марат Шихаьлиевлул. Ванал мукунма бувсунни конкурсрай гьуртту хьун ччисса тамансса бушиву. Конкурсрай гьуртту хьун оьвтIий бур 18- 45 шинну хьусса, ларайсса кIулшиву дусса инсантурайн. СВО-лул гьурттучитал кьамул буллалиссар цалчин ярглий.
Министрнал тIимунийну, конкурсрал чIявуми гьурттучи­тураща бюхъан тIий бур кадрардал луртандалувун багьан, стажировкагу дурну, Дагъусттаннал энергетикалул бутIул зузалтрал командалувун буххан.
Арсен ХIажиевлул ­бувсунни, заявкарду кьамул дуллай бушиву апрельданул 1-ннийнин.
Конкурсрал дур 3 ятIап: регистрация, тестру дуцIин даву ва практикалулмур бутIа, финал хьунтIий дур Пятигорскалий «Машук» тIисса кIулшивурттал центрданий. Кадрардал конкурсрай гьуртту шаврил хIакъиравусса заявкарду дуркIун дур, Дагъусттанная дакъасса, билаятрал цайми регионнаягу. Ттинин дуркIун дур 60 заявка.
«Конкурсрай ххув хьуминнан дулунтIиссар багьлул ххирасса призру, дипломру, ми гьан бувантIиссар «Россети Северный Кавказ» ПАО-лийн стажировкалий ва давурттай битантIиссар «Дагэнерголий». «Энергия гор» кадрардал конкурсрал гьур­ттучитураща бюхъантIиссар тIалав дуван цанна лайкьсса даву, каялувшиврул къуллугъругу хIалану. Конкурсрал финалистъталну хьунтIиссар сайки 40 ­инсан, миккун биянцIа ми гьуртту хьунтIиссар 3 ятIапрай», – ­кунни Арсен ХIажиевлул.
ХIасан Аьдилов