Москавлив хьунни «Единая Россия» партиялул XXII съезд. Дагъусттаннал делегациялувух ваний гьуртту хьунни Аьрасатнал СВО-лул цалчинма Виричу НурмахIаммад ХIажимахIаммадовлул нину, МахIачкъалаллал 54-мур школалул директор Сапижат Мазаевагу.
– Ттун пахру багьлай бия Аьрасатнал гьарца мурцIния бувкIсса уртакьтурал кьюкьлувух навагу буну. Дусшиву цIакьнийри Ватангу цIакьсса. Жу циняв аьмсса мурадрал цачIун бувсса агьлу бияв, гьанумур мурадгу – Аьрасат цIа-кьини бюхттулсса, экономика хьхьичIунсса, социал къайгъурдах багьайкунсса къулагъас дусса, цIакь бусса билаят бушивур. Аьрасатнал президент Владимир Путиннул кIицI лавгуна «Единая Россия» партиялул аьрай талатиминнан ва миннал кулпатирттан кумаг бувайшиву, партиялул цIа рирщуну бувчIусса депутатътал ва каялувчитал СВО-лий, чIявусса иширттаву чувшиву ккаккан дуллай, гьуртту хъанай бушиву.
МаслихIат бувна СВО-лул ветерантурахасса партиялул чулухасса аякьа хIура дуккан къадитан. Навагу вай давурттавух хIаласса бухьувкун, ттун мудангу асар шай билаятрал бакIчи дакIцIуцIаву дуну къуццу тIий ушиву ва чулийнайгу, хаснува аьрая цIунцIияртту хьуну, чулахъ хьуну бувкIминнах. Залдануву хъами чIявусса бушиврул чIалачIи буллай бия, вайгу политикалул иширттавух чялишну гьуртту хъанай бушиву, билаятрал агьалинал оьрму ххуй бавриву бутIа бишин хIарачатрай бушиву. Вава мурадрай жу «Единая Россия» партиялул региондалийсса «Хъаннил ккуран» хъун дуван хIарачатрай буссару. Съездрай партиялул жяматийсса штабрал «СаллатIнал сурат» тIисса проектрал презентациягу хьуна.
«Россия» центрданул фойелувусса баннерданийсса 40-ннавух ттул арснал, Аьрасатнал Виричув НурмахIаммад ХIажимахIаммадовлул, суратгу дия. Жулва арсваврал жанну харж дурссар билаятрал мурадру буручлай, мюхчаншиву дуручлай. Аьрасатнаву ххуйсса оьрму дузал буллан, захIмат буллан жуйвагу буржри, лагма лавгун, пикригу, дакIругу ца дурну, вава мурадраха, вава хIарачатрай зунтIиссару. Съездрайн бавтIциригу, агьамсса масъалартту ххал бигьлагьимигу, циняв, ва ттул куннасса тарап дургьусса агьлур. Дагъусттангу, Аьрасатгу бюхъаннав! – увкунни Сапижат Мазаевал.
ПатIимат Рамазанова
