Совет ХIукуматрал ва Аьрасатнал композитор, дирижер, педагог, жяматийсса ишккакку Мурад МахIаммадович Къажлаев увну ур 1931 шинал Бакуй Гъумучатусса хIакинтурал кулпатраву. Ганаву музыкалул пагьму ва гъира хIасул хьуну бур оьрчIнияцIава. Дуклай ивкIун ур Бакуйннал консерваториялучIасса Музыкалул дянивмур даражалул школалий фортепианолул классраву. 1955-1958 шиннардий дарсру дихьлай ивкIун ур МахIачкъалалив П.И.Чайковскийл цIанийсса музыкалул училищелуву, 1957 шинал хьуну ур Дагъусттаннал радиолул симфониялул оркестрданул хъунама дирижер, 60-ку шиннардий зий ивкIун ур Дагъусттаннал филармониялул художественный каялувчину. 2010 шинал Дагъусттаннай сакин бувну бур пагьму бусса оьрчIансса музыкалул школа, 2011 шинал тIурча, ва школалучIа сакин бувну бур Дагъусттаннал музыкалул культуралун хас бувсса музей. Ялапар хъанай ивкIун ур Москавлив, махъсса шиннардий – МахIачкъалалив.
Мурад МахIаммадович Къажлаев дунияллия лагаврин хасъсса церемония хьунни декабрьданул 24-нний, алхIаткьини.
Пагьму-гьунар бусса композиторнащал личIи хьун бувкIун бия ДР-лул ХIукуматрал председатель Аьбдулмуслим Аьбдулмуслимов, ДР-лул БакIчинал ва ХIукуматрал Администрациялул каялувчи Алексей ХIасанов, МахIачкъалаллал мэр Юсуп Умавов, культуралул министр Зарема Буттаева, парламентрал вакилтал, властьрал органнал каялувчитал, жяматийсса ишккаккулт, маэстрол мачча-гъанми.
Мурад Къажлаев аьпалул хьунни оьрмулул сайки 93 шинаву нанисса ппурттуву. Ванал творчестволул ирс ва профессионалшиврул давуртту хьуссар 20-мур ттуршукулул Дагъусттаннал культуралул яла бюхттулмур хьхьичIуннайшивуну. Композиторнал МахIачкъалалив сакин бувссар личIинува пагьму бусса ОьрчIансса Республикалул школа ва муний каялувшивугу цува дуллай ивкIссар.
Церемония дачин дурну ия ДР-лул ХIукуматрал председательнал хъиривчув Муслим Телякавов.
Цалчин махъ лавхъуна республикалул премьер- министр Аьбдулмуслим Аьбдулмуслимовлул.
– На Республикалул бакIчи Сергей Меликовлул ва ттулагу цIанияту циняв мачча-гъанминнахь ва дагъусттанлувтурахь жижара буллай ура. Мурад МахIаммадович Къажлаев – цалла цIагу, Дагъусттаннал цIагу мусил хIарпирдай дунияллул искусстволул ва культуралул тарихраву чирчусса инсанни.
Буниялагу, ва хъанахъиссар жула халкьунналгу, дунияллул жяматиртталгу дах1алай чинсса инсан.
Дагъусттаннал Композитортурал союзрал председатель Рамазан Фаталиевлулгу мукунма жижара бунни композиторнал мачча-гъанминнахь.Церемониялий махъ лавхъуна Юсуп Умавовлулгу.
Къажлаевхъал кулпатрал чулуха ихтилат бувна Аслан Къажлаевлул.
