ЦIусса дуккаврил шинаву Лакрал райондалий цалчинмур классравун лавгунни 45 оьрчI, вайннава 19 – Гъумучиял школалийн. КIулшивурттал кьини барча дан увкIун ия райондалул бакIчи Зураб Куччаев, ДР-лул Халкьуннал Мажлисрал депутат Марат Илиясов.   Линейка дайдирхьуна паччахIлугърал гимнрахун ттугъ гьаз баврия.  

Дуклаки оьрчIру барча буллай, Зураб Куччаевлул увкунни: «Ххирасса оьрчIрув, зуйнни жул вихшалагу, умудругу, зул кIунттихь буну тIий райондалул бучIантIимур. Гьамин, зул кIулшивурттал ва хIарачатрал кIунттихьри дусса зула шяраваллил ва щала райондалул гьунттийсса кьини. Кьастгу лархIуну, сивсуну ласласияра мунийн биянсса шаттирду». ТIайлабацIу чIа увкунни Марат Илиясовлулгу.

«КIулшивуртту – мури зул бучIантIимунивунсса  инвестиция.  Ххарисса хьуннав дуккаврил шин. ЧIяру даннав зул хьхьичIуннайшивуртту», – увкунни ванал.
Прокурорнал буржру биттур буллалисса Хизри Нур­бахIандовлул барчаллагь увкунни педагогтурахь ва нитти-буттахь вайннал оьрчIах дуллалисса аякьалухлу. Школалул директор Соня Маккаевал барчаллагь увкунни бусравсса хъамаллурахь ва нитти-буттахь даин чIарав бушиврухлу.

Цалчинмур классравун наниминнахь ххуллухъин тIий, ванил увкунни: 
«Ххирасса  оьрчIрув! ХIакьину зул оьрмулуву байбихьлахьиссар агьамсса ххуллу. Гьарзатрал дайдихьу школалиятур нанисса – цалчинсса кIулшивурттугу, кьиматругу, дусшиву ва ччавугу. Школа – му бусса оьрмулийсса гьанур. ТIитIиннав зул дакIру кIулшивурттал хьхьичI, школалийсса шиннугу дакIний личIаннав так кьиматирттайну дакъасса, дакI тIайласса дусшивурттайну ва яргсса иширттайнугу», – увкунни ванил.

Дуклаки оьрчIал дурккунни буттал кIанттухасса, цашиврухасса,  дусшиврухасса, дакьаврихасса назмурду.
Ахирданий ацIния цалчинмур классрал дуклаки оьрчIал цалчинмур классравун наниминнайх бавчIунни школалул кьай-кьуйлул лащу-щаллусса портфеллу. 

Шиккува кIицI бан, вай портфеллу райондалий цалчинмур классравун нанисса мукьцIаллий ххюягу оьрчIан лавсъссар  Зураб Куччаевлул ва Марат Илиясовлул  «Собери ребенка в школу» тIисса  щалагу Аьрасатнал акциялул лагрулий.