Август зурул 1-нния 9-ннийн Москавлив «Зарядье» тIисса паркраву най дуссия Аьра­сатнал Театрал ишккаккултрал союзран 150 шинал савлугъран хас дурсса Щалагу Аьра­сатнал театрдал фестиваль «Россия-Театр-Общество».

Проект дузрайн дуркссар Аьрасатнал Культуралул министерствалул, Москавуллал культуралул департаментрал ва Культуралул сиптардан ка-кумагрансса Президентнал фондрал кабакьулуцIух. Билаятрал хьхьичIунсса академический, музыкалул ва драмалул театрду цачIун бувсса хъунмасса театрал проектрай Дагъусттаннал чулуха гьуртту хьунсса тIайлабацIу хьунни А. Къапиевлул цIанийсса паччахIлугърал Музыкалул ва драмалул театрданун. Ухссавнил Ккавкказнал театрдал программа тIитIинсса ихтияргу жула театрданухь дия.

«Зарядье» амфитеатрданул сахIналий ккаккан бунни У. Шекспирдул «Укрощение строптивой» пьесалиясса спектакльданувасса бутIа. Режиссер Ухссавнил АсатIиннал ва Къабардин-Балкьарнал республикарттал халкьуннал артист Гиви Валиев.
Ва магьирлугърал агьамсса ишираву гьуртту шаврийну жула артистътураща бювхъунни ккаккан дан Москавуллал тамашачитуран ва хъамаллуран Лакрал театрданул творчество, ванил чIярусса шиннардил тарих ва аслийсса сахIналул магьирлугъ. Коллективрайн сахIналийн оьвчиннин фестиваль дачин дурминнал гьарза-гьартану бувсунни театрданул тарихрая ва авадансса ххуллия.
ДакIнийхтуну ххариссару жула театр ва артистътал билаятрал хьхьичIунсса театрдал ххуттай бушиврия. ЧIа тIий буру хъуни-хъунисса ккаккияртту.

Зулайхат Тахакьаева