Лакрал райондалул бакIчи Зураб Куччаевлул каялувшиндаралу Уриннал шяраву хьунни идарарттал каялувчитал гьурттусса совещание.

Шиккува кIицI бан, апрель зуруй хьусса тIабиаьтрал апатIру сававну Мукьархъиял махIлалийнмайсса ххуллу бавщуну бушиврийн бувну, райондалул бакIчинан ва ванащал наниминнан багьунни дучрай гьан.
Совещаниялий гьуртту хьунни райондалул бакIчинал кумагчи Абакар Акаев, Депутатътурал собраниялул хъунама Явсупи ХIамзаев, администрациялул отделлал ва идарарттал каялувчитал.

Ури-Мукьардал шяраваллал бакIчи СалихI Гьаруновлул бувсунни шяравалу хьхьичIуннай даврил ххуллий дан бювхъусса ва дан дакIнийсса давурттая. Муния махъ цинявннал цачIу ххал бивгьунни шяраваллил социал-экономикалул суаллу, ккаккан дунни шяраваллу хьхьичIуннай шаврил ва агьалинал оьрмулул шартIру къулай даврил ххуллий дансса давурттал сияхI. Хъунмур къулагъас дурунни финансирттал ва экономикалул суаллах. Райондалул администрациялул финансирттал отделданул каялувчи Марат Бугъуннаевлул бувсунни ччувччусса ттукрахсса буржирдая. Бюджетравун дукIлакIисса налогирттая ва буржру лакьинсса чаранная бувсунни налогру датIаврил хъунама пишакар Оьмар Абакаровлул. КIицI лавгунни вай суаллу администрациялул муданнасса къулагъасралу бушиву.
Райондалул избиркомрал хъунама Илияс ХIажиевлул бувсунни сентябрьданул 20-нний хьунтIисса бувчIавурттайнсса хIадуршиндарая.

Лакрал ва Ккуллал районнал аьралий комиссар Аьли ГъазимахIаммадовлул бувсунни СВО-лий къуллугъ буллан контракт чичаврил шартIирдая ва хасъсса аьралий операциялий гьуртту хъанахъиминнан цаннагу, миннал кулпатирттанссагу ка-кумагран ккаккан дурсса хIаллихшиннардая.

Ахирданий Зураб Куччаевлул тапшур бунни идарарттал каялувчитурайн совещаниялий сукку бувсса суаллацIунсса хIукмурду лякъин. Ванал кIицI лавгунни гьарца структурардал даврил саргъуншиврул ва жяматращалсса дахIаврил агьамшиву.
«Жула цинявннал аьмсса мурад – хIасул хьусса суаллах анаварну къулагъас дурну, миннул ялув цачIу зузавур. Так властьрал органнал жяматращалсса цIакьсса дахIаву духьурчанни жущава бюхъантIисса буттал кIану хьхьичIунмай бан. Хаснура къулагъас дан ччай бур: бюджетравун нанисса арцу гьарцаннан чIалай дикIан аьркинссар ва агьамсса иширттая агьалинан баян буллан аьркинссар цила чIумал», – увкунни Зураб Куччаевлул

Зулайхат Тахакьаева