Хирургиялул отделениялул хъунама Сулайман Сулайманов:
- На хирургну зий 30-ллийсса шинну хьуну дур. Вайксса шиннардий чIярусса давуртту канилух дурккунни. БучIай захIматсса цIунцIиярттащалссагу. Отделениялий зурул мутталий хъин хьун ккаккан увну ур 33 къашайшала, амма стационарданий хъин хъанай бур 5-6, мунил савав хъанай дур райондалий инсантал чан хъанай бушиву.
Щавурду дахIайсса материаллал ва дарурттал щаллуну буру, медициналул техникагу дур. ХьхьичIва отделениялий 17 койка бикIайссия, утти 10 ливчIунни. ЗахIмасса цIунцIиярттащалсса инсантал тIайла буккару межрайонный стационарданийн Лаващав.
ЖучIа отделениялий зий­ бур мукьва медсестра – Сул­танпатIимат Оьмарова, Забигат Закарьяева, Аьйшат Сулайманова, Малвина Бариева.

Терапиялул отделениялул хIакин Анисат Жалаева:
- Терапиялул отделениялул хъунама ккаккан увну акъар, кIия терапевт зий ур. Отделениялий бур 25 койка, къашайшала ур 13. ЖучIан бучIайссар жула райондалиясса бакъасса, чIаравсса районнал шяраваллавасса къашайшалтгу, Ккуллал, Лаващиял районнал (ЦIахъарату). «Анаварсса кумагран» аьркинсса даруртту ва цаймигу затру жула шиккусса аптекалува итадакьайссар.
ЦIанасса ппурттуву жучIа хъин хъанай бур гипертония, пневмония, бронхит, къюкIлил ишемия, энцефалопатия дусса, инфаркт, инсульт хьуну махъ реабилитациялийсса къашайшалт.

ХIакин-эндокринолог Сабина Вагьабова:
- Ашкарагу дуллай, хъингу дуллай буру виваллил секрециялул железардал азарду. Цалчин кIанттай дур сахарный диабет, кIилчинмур кIану бугьлай бур щитовидный железалул зобрал. Ашкара дарду 115 инсаннайсса азарду ва нюжмардийгу 2 инсаннайсса азарду кIул дарду.
Аьркинсса дарурттал дузалну буру. Даруртту итабакьайссар республикалул ЦIуллу-сагъшиву дуруччаврил министерствалул жул заявкалийну. ХIакиннал мурад къашайшалт чIумуя чIумуйн хIакинначIан бучIавур цила чIумал азар ашкара даншиврул.

Зарема Гъазиева, лабораториялул хъунмур:
ЖучIа зий бур лаборанткахъул: Бика Щурпаева ва ПатIи Буттаева.
Жун аьркинссар зуруй 20 инсан кьамул уван, амма инсантал муданма ца куццуй букIлай бакъар: кувний чансса бучIай, кувнийгу – ххишаласса.
Жу кьамул дару личIи-личIисса журалул анализру. Лабораториялуву дикIан аьркинсса цинярда аппаратура, аьркинлугъ жучIа дур. Буниялагу лабораториялуву, циняв отделениярттаву кунна, марцIшиву, лази-лакьишиву дур шагьрулийсса цаппара азарханардал зузалтрал дахIалай учинсса.