«Дагестан» РИА-лул редакциялий хьунни социал газификациялул программалул лагрулий уква газ буцаврил хIакъиравусса масъаларттан хас дурсса пресс-конференция.

Вай масъаларттая балжину бувсунни Дагъусттаннайсса Росреестрданул управлениялул каялувчинал хъиривчу Марат Абакаровлул, ДР-лийсса «Роскадастрданул» директор Апанни Дагуевлул, «Газпром газораспределение Дагестана» ООО-лул хъунама директорнал хъиривчу Расул Юнусовлул ва Догазификациялул компаниялул управлениялул каялувчи Амина Зубайруевал.
Конференциялий бувсунни жула региондалий чялишну зузи дурсса догазификация программалул лагрулийсса давурттая. Ларгсса шинал газ бувцуну бур 2400 къатлувун. Ялу-ялун чIяву хъанай бур программалийхчIин уква газ буцинсса инсантурал сияхI. «Газпром газораспределение Дагестана» ООО-лул вакилтурал бусаврийн бувну, программалийхчIин газ буцинсса 10 000 аьрза кьамул бувну бур.
Пресс-конференциялий ли­чIиссара къулагъасрайн лавсунни программалийхчIин садоводческий товариществардайн газ буцаврил масъалартту. Гьашинусса шинал апрель зуруй АьФ-лул ХIукуматрал кьамул бувну бур садовый участокирттал дазуйн бияннин уква газ буцинсса хIукму.
Садовый участокирттал дазуйн бияннин уква газ буциншиврул дузал бан багьлай бур Росреестрданул тIалав буллалисса документру. Росреестрданул хIадур бувну бур уква газ буцин ккаккан бувсса документру бигьану дузал бансса маслихIатру бусса методичкартту.
Марат Абакаровлул бувсунни, социал газификациялул программалул агьаммур мурад, агьалинал оьрмулул шартIру къулай даву хъанахъишиву. Программалул кумаграйну, анаварсса мутталий газрал дузал хъанай бур шяраваллал ва дачардал кIанттурдай ялапар хъанахъисса инсантал.
ХIакьинусса кьини щала республикалий программалул каши-кьудратрайну 6,7 азарва къатравун газ буцинссан сант дур.
Амина Зубайруевал бусаврийну, садоводческий товариществардай ялапар хъанахъисса инсантураща бю­хъайссар ва программалул лагрулийсса хIаллихшиннарду ишла дан. Ккаккан дурсса хIаллихшиннардаву дур 100 азарда къурушрал лагрулийсса субсидияртту. Вайннун итадаркьусса арцу ишла дан бюхъай­ссар участокрайн газ буцлаци­сса давурттан.
Шиккува бусан, агарда кка­ккан бувсса документру дузалну бакъахьурчан, догазификация программалул лагрулий газ буцинсса аьрза кьамул къабуллалиссар.
Пресс-конференциялул ахирданий, ведомствардал каялувчитурал жавабру дуллунни журналистътурал суаллахьхьун.
Имара Саидова