Мартрал 13-нний Аьрасатнал Федерал Мажлисрал Па­ччахIлугърал Думалул депутат Жамалдин ХIасанов ва ванал кумагчитал бувкIунни ЦIуссалакрал райондалийн. Администрациялул къатраву хъамал хьунабавкьунни райондалул активращал.

ЦIуссалакрал райондалул бакIчи МаматIи ХIамзатовлул хьхьичIун лавсунни депутатнал кумаг аьркин багьлагьисса ма­съалартту. Ванал бувсунни райондалий дурсса социал объектирдая, бакьин бувсса жяматийсса кIанттурдая, мукунма райондалул гьурттушинна дурсса федерал ва региондалул проектирдая ва программардая.
КIицI лавгунни цIу миналийн бизан бувсса агьали хьунабакьлакьисса масъалартту, хаснува электроэнергиялулмур. Хьунабакьаврий ихтилат хьунни хасъсса аьра­лий операциялул гьурттучитурал кулпатирттан кумаг баврия, агьали контрактрай къуллугъ бан кIункIу баврия.
Ва кьини депутатнал ххал бивгьунни райондалул агьалинаясса 30-нния ливчусса аьрзарду. Ми чIявуми бия бизан баврил, аьрщарал масъаларттацIун бавхIусса, мукунма хьхьичIвасса заллухъруннан зана дурсса къатрах компенсацияртту къабуллалаврил, бизан буллалиминнал сияхIравун райондалул кьатIув щар хьусса, райондалий къазузисса хъами къабагьлагьаврил хIакъиравусса.
Цала масъаларттащал депу­татначIан бувкIунни хасъсса аьра­лий операциялий жан дуллусса кIия аьраличунал кулпатругу.
Шанна ссят хьунни агьалинал гьаз бувсса масъалартту ххал бигьлай.
– Цинявппагу шикку гьаз хьусса маса-суаллу тIайла буккантIиссар хасъсса министерстварттайн ва ведомстварттайн. Ми щаллу баврил ялув бацIантIиссар ттул кумагчитал. Навагу циняв ма­съалартту ттула къулагъасрайн ласунтIиссар, – увкунни Жамалдин ХIасановлул.
Андриана Аьбдуллаева