Вай гьантрай (ххуллункьини) М.Илиясовал цIанийсса «Дараччи» ихIсандалул фондрал Москавливсса филиалданул душру цал ттигу бивунни хасъсса аьралий операциялий щавурду дирну, личIи-личIисса госпитальлай хъин хъанахъисса жула аьралитурачIан.

Ва акция «Дараччилул» аьдат­равун дуртун дуссар. Фондрал уттинингу дурссар цикссагу ххаллилсса давуртту. Миннувагу ца яла бусравмурну чIалай дур ччя-ччяни вай захIматсса цIунцIияртту хьусса аьралитурачIан бивну, вай ххари баву, вайннал дакI данмур буллалаву. Жула оьрчIан вай хIакинталгу, цIигьуртал ва психологталгу бур. Ва бигьасса даву дакъар. Цалчин, госпитальлайн буххан къабитлай, миннат-суннатру буллай, ихтияр ласлай авара хъанай бур душру. Шикку кIицI лаган ччива, хъуниминнайн бувккун, му ихтияр ласун, госпитальлайнсса ххуллу тIитIин мудан кумаг байсса, Обороналул министерствалул Санэпиднадзорданул хъунмур центрданул хIакинтал, жула лак БахIрам Аьлиев ва Жамиля Абакарова, вава Центрданул зузала Ххадижат ЦIаххаева. Москавливсса манзиллу хIисавравун ласурча, ца кьини кIива-шанма кIанайн биянгу къабигьану бур. БувкIун махъгу, тай аьралитурал тагьар цIими ххисса жула душваврайн хъинну асар хъанай дур. Госпитальданийн бачин хIадур хъанахъисса чIумал душваврал хьхьувайния кIюрххилнин шану лахълай бакъар, цаннищал цаннил икьрал дурну, личIи-личIисса дукрарду дуллай бур, ттучанная ларсмур къахIисавну.

 
Госпитальлайн нанаврия ихтилат багьувкун, мудан вай давурттан чIалансса кумагру байсса «Дараччи» фондрал президент Гульшан Хасаевал цилагу увкунни: «На миккун бувкIссания, хъунмасса хIаллай ттуйнма нава бучIан къахьунссия. Зу вирттал буру, душрув», – куну.
Шиккун бучIаннин вайннал кIул буллай бур цумур госпитальданий бурив чIявусса ягу захIматсса тагьарданувусса дагъусттан оьрчIру.

 
Ва ххуллухь жула душру, цIана «Дараччи» фондрал Москавливсса филиалданий каялувшиву дуллалисса Басират Билалова, ванил ссу Зирая Оьмариева, Ххадижат ЦIаххаева, Шовлукь Илиясова, ПатIимат Садыкьова, Саибет Аьлиева бивунни Волгоградуллал проспектрай бивхьусса Дяъвилул ветерантурал 2-мур госпитальданийн, Аьрасатнал Обороналул министерствалул А.А.Вишневскийл цIанийсса аьралий госпитальданул 3-мур филиалданийн (Одинцовский район), вава госпитальданул 4-мур филиалданийн – Краснознаменск шагьрулийсса НМИЦ ВМТ (Национальный медицинский исследовательский центр высоких медицинских технологий). КIицI къалавгун битан къахьунссар, «Дараччилул» душвавращал аьркинний ка-кумаг бан мудан буссар Басиратлул лас Багьауттингу, ссийл лас Камалуттингу – уссурвал Билаловхъул.
Арцу рартIун, душваврал хIадур бувну бия дука-хIачIанмур, нацIу-кьацIу, лаххи-ликкия дусса ацI-ацIва кьуцуру гьарица госпитальданийн.

 
Одинцоволийсса госпитальданий хъин хъанахъисса аьра­литуравух ур Хъювхъиял шяравасса Эльдар ХIусайнов. ХъунмурчIин муналшиврий хьунни ва ххуллухьсса госпитальлайнсса аьрххигу.
Ца госпитальданий вай бивунни Курскаллал областьрай щавурду дирсса, срочний къуллугъ буллай ивкIсса Ленинкантлиясса яруоьрчIачIангу. Гъазиханнул аьралуннавусса къуллугъ къуртал хьун кIива барз ливчIун бивкIун бур. Ва нанисса машина дронналул пIякь учин бувну, циняв аьралитурава ца ва сагъну ливчIун ур. Жула душру ваначIан хьхьичIгу бивссия. Арулла шин хьуния шинмай дин-чак буллалисса, цавагу чак, зума къакьариртсса, Кьурандалул чIявусса аятру дакIних кIулсса жагьил ур тIий, буслай бур вай.
«Дараччилул» душваврал дакIнил гъилишиву дирхьусса ссайгъатру бивунни шанмагу госпитальлайсса Дагъусттаннаясса бакъассагу,Ухссавнил Ккавкказуллал республикарттаяссагу аьралитурачIан.
Ци дикIайссар цIунцIиярттал азурда бувсса, хъунмасса хIаллай ватандалия архсса, мачча-гъаннах мякь бувксса аьраличу ххари авунияр чирисса. Вай душваврал дуллалимур ссал тIурчагу багьари.

 
Цала-цала давурттах, ичIаллил къайгъурдах, мажал бушиврух-бакъашиврух къабурувгун, цачIу хIукмугу бувну, га цIана бивзун лагай вай цахва мюхтажнийн. АллагьначIа лякъиннав вайннал дуллалисса хъуннасса чирилул даву.
Ва ххуллухь госпитальлайн бучIан къахьурчагу, тиккунсса ссайгъатру хIадур бан ххуйсса кумаг бунни гьар мудан кунма «Дараччи» фондрал президент Гульшан Хасаевал, ЧIурттащатусса Жабиратлул ва ванил ссийл Майял, цумурцагу ихIсандалул давурттавух чялишну гьуртту шайсса, ка тIиртIусса Камалуттин ва Анфиса Билаловхъал, мукунна ва давриву гьурттушинна дунни Рамелла Хайдакьовал.
– Аьдатравун багьну буссар, «Дагестан» МЦК-лул чулухагу, М. Илиясовал цIанийсса» Дараччи» ихIсандалул фондрал чулухагу, жу, цаппара душру, чIун-чIумуй лагайссару Москавливсса ва Москавуллал областьрайсса госпитальлайн, СВО-лий щавурду дирсса жула аьралитурачIан. Лагару нахIусса жула дагъусттан дукрардугу дурну, миннан аьркин дагьлагьимургу ларсун. Бур миннаву мачча-гъанми чIарав бакъассагу. Ми оьрчIру хъинну ххари шай жу бувкIукун. Жувагу ххари шару ми ххари бан бювхъуну тIий. Ва давриву чялишну кумаг буллалисса цаппара цIардугу кIицI лаган ччива: гьармуданмасса чIарав бацIу, фондрал хъунмур Гульшан Хасаева, Зарема Аьлиева, Ххадижат ЦIаххаева, ПатIимат Садыкьова, Шовлукь Илиясова, Саибет Аьли­ева, Гулизар Башанаева.

Гульшан Хасаевал кумаграйну госпитальданий хъин хъанахъисса жагьилнан багьлул ххирасса коляска ласун бювхъунни. Му диян дан лавгсса чIумал жун ккавккунни цуксса ххари хьуссарив жагьил ва цуксса кумаг хьуссарив танан. Укунсса инсантурал чIарав бацIаву ва шаймур баву жулвагу буржри. Жу мукунма гьуртту шару «Каспий» батальондалул талаталтран гуманитар кумаг батIавривугу. Ванияр тихунмайгу жущава шаймур буллан дакIний буру, – тIий бур Басират Билалова.
Барчаллагьри госпитальлайн лавгминнангу, кумагру бувминнангу. Зу къинттуллухсса виртталлу. ЦIуллушивугу, ссавургу дулуннав. Зу бувмур чирину бацIаннав.