Новостройрайсса къайгъурду
Ноябрьданул 6-нний жу хьунабавкьуру ЦIуссалакрал райондалул цIусса миналийсса ЖКХ-лул идаралул директор Аьли ХIусмановлущал.
Ванал бусаврийну, цIанасса ппурттуву тIювалул коммунал хозяйствалул хIаллихшинну (услуги) бартдигьлай бур, хьхьичIми шиннардих бурувгун, лайкьсса даражалий.
Тамансса диялдакъашивуртту хьун дурну диркIун дур цаппара шяраваллаву подрядчиктурал канализациялул системартту дузал дуллалисса чIумал. Март-апрель зурдардий гужсса гъараллу ларчIуну гьарзат щинахьхьун ларгсса чIумал ЦIуссаккуллал шяраву зий бивкIссар Лак цIусса миналийн бизан баврил управлениялул, «Новострой» дирекциялул ва ЦIусса миналийсса ЖКХ-лул зузалт цачIу 1,5 зурул мутталий подрядчиктурал хьун дурсса диялдакъашивуртту духлаган дуллай. Щинал канализациялул системалул люкру гъагъан дурну дия. Чапаеволийгу дукьан дурну дур диялдакъашивуртту, миккун заказ дурссар 12 насос.
Вайми шяраваллаву канализациялул системартту уттигу дузал дурну дакъар.

Гьашину щинал чулуха захIматшивуртту дакъасса дур, так гъинттул дикIайсса дур щин чан шаву. Интту ххал байсса бур щинал турбарду, диялдакъашивуртту лякъирча, ми бакьин байсса бур.
Гара кьини жу хьунабавкьуру Новостройрайсса «Межрегионгазрал» вакил МахIач Аьбдулхаликьовлущалгу.
Ванал бусаврийну, шяраваллу газрал щаллу давриву захIматшиву дакъасса дур. Так ца диялдакъашиву хьунадакьайсса дур ванал давриву – ччувччусса газрахсса багьа булаврил низам цаппара шяраваллал муштаритурал лиян дуллай бусса бур. «Гьарца зурул 10-15 ччувччусса газрал ккаккиялул сурат телефондалийн ларсун, зурул 25-ннин багьа булун аьркинссар», – увкунни Аьбдулхаликьовлул. Ванал мукунма исват бунни газ бацлацисса ишру нажагь бакъа къашайсса бушиву.