Дагъусттан Республикалул Халкьуннал художествалул промыслирттал центрданий хьунни туризмалул ва халкьуннал художествалул промыслирттал министр Эмин Мердановлул пресс-конференция.
Ванийсса ихтилатру бия дунияллул халкьуннал дянивсса «МIТТ 2025» туризмалул выставкалий жулла республикалул дурсса гьурттушиндарал хIасиллаясса, ва шинал дуван дакIнийсса давурттаясса.
«МIТТ» хъанахъиссар гьарца шинал дувайсса Аьрасатнал туризмрал ца яла хъуннамур выставка. Ваний гьуртту хьун бучIайссар щаллагу дунияллул хIукуматирттая. Жулла республика шикку гьуртту хъанахъисса мукьулчинни. Гьашину жулла республика ва выставкалий ххув хьуссар «Лучшее представление региона России» номинациялий. Жулва стенд ххал бувну бур 16 азарунния ливчусса инсантурал. Выставкалий дурссар чил билаятирттащал уртакьшиврий зузаврил кьутIирду.
Министрнал бувсунни шиная шинайн Дагъусттаннай туризм хьхьичIуннай хьуну най душиву, федерал даражалийгу туризмалуву лайкьсса кIану бугьлай бушиву жулла региондалул.
Туристътурал мюхчаншиврия тIий, министрнал кIицI лавгунни туристътал гьурттуну хьусса бала-апатIсса ишру сайки циняв бавхIуну бушиву квалификация дакъа зузисса турагентътуращал. Бувсунни ва шинал мартрая тиннай жулла республикалий бигьалаглагиминнал мюхчаншивруцIун дархIусса даву гужлан дуллай бушиву. Гидтурал ва туроператортурал квалификация ларай даву мурадрай, сакин бувну бушиву аттестацияртту бувайсса комиссия. Аттестация дурхIуми экскурсоводтуран булайшиву квалификациялул барашинна дуллалисса хасъсса документ ва хьувун лачIайсса лишан, вай дакъана зунсса ихтияр дакъашиву. Министрнал бувсунни квалификация дакъа зузисса гидтурал масъала туризмалуву ца яла цIюрувкьумурну личIлачIишиву.
Бувсунни Къаяккантуллал райондалий шагьру-курорт ва Дарбантуллал райондалий Каспийлул прибрежный кластерданул проект щаллу давриягу, вайннуйн дагьайсса смета щаллу дуршиву, ва шинал строительствалул ва монтажрал цалчинсса давуртту дуллай байбишинсса пикри бушиву.
Пресс-конференциялул лагрулий хьунни Дагъусттаннал улча цуксса ххуйну кIулну бурив ххал буллалисса хIазсса викторинагу. Ваний тIайласса жавабру дуллуминнан бахшишру дунни.
Ахирданий Министерствалул даврия хьхьичIунну бусласисса, чичлачисса журналистътуран ва изданиярттан министрнал буллунни Барчаллагьрал чагъарду, дунни бахшишру, вайннавух «Илчи» кказитрал редакциялунгу.
