ЦIуссалакрал райондалий буллалисса мурчай электростанциялий дацIан дунни 11 установка. БувтIунни 37 ветроустановка дишинсса гьану.

Ветроустановкарттал лахъшиву дур 150 метра, мугу хъанай дур 50 зиву дусса къатрал лахъшиврийсса.
Мурчай электростанциялий дикIантIиссар 120 ветроустановка. Электростанция аьмну 300 МВт бусса бикIантIиссар, ва буллалиссар 2 ятIапрай. Цалчинмур ятIапрай, гьашину зузи дантIий дур152 МВт бусса 61 установка. Вайми 59 установка зузи дантIий дур 2026-ку шинал. Мурчайсса электростанция баврийну Дагъусттаннал энергосистемалуву ххишала хьунтIий бур шинай 1 млрд кВт/ч.

Шиккува кIиц лаган, Дагъусттаннай хьхьичIунну бартдигьлагьисса 6 проектравасса 1 хъанай дур хъунисса электростанцияртту бавриха зузисса «Росатом Возобновляемая энергия» АО-лул ЦIуссалакрал райондалий буллалисса мурчай электростанция. Ва хьунтIиссар билаятрай яла хъуниминнувасса цану.
Дагъусттаннал Экономикалул министерствалул 2023-2024-ку шиннардийсса даврил хIасиллайн бувну, СКФО-лул субъектирттал дянив хьхьичIунсса проектру зузи даврил чулуха Дагъусттан цалчинсса ххуттай бур.

Имара Саидова