Дагъусттаннал луттирду итабакьай издательствалий бувккунни жагьилсса лаккуоьрчI КьурбанхIамид Аьлиевлул «Предназначение» тIисса шеърирдал жуж.

Ва хъанай бур авторнал цалчин итабавкьусса лу. Шеърирдурив ва чичлан ивкIун ур чIивинийва. ОьрчIнийсса шеърирду сайки циняв бур Буттал кIанттухасса.
2020-ку шинал Кьурбан­хIамидлул цаппара шеърирду бувккун бур ­республикалул кказит-журналлай.
Жагьилсса авторнал (ванан дахьра 22 шин дур) шеърирду бакъар чIявучин ва оьрмулувусса ­автортурал кунма эшкьи-ччаврихасса. Вай бур ­оьрмулуха къалавхьхьуну куртIсса, кIанийн багьсса, дунияллул мяъна-мурадрая, инсаннал дунияллий­сса миссиялия, лагма-ялтту хъанахъимунихсса жаваблувшиндарая, оьрмулул ва тIабиаьтрал иширттая щугълурдайсса. Му аьч хъанай бур шаэрнал луттиран дуллусса цIанивагу.
Луттираву бивщусса шеърирдалгу, миннул хъирив бивщусса (авторнал пикрирдацIун бавкьусса) цIанихсса шаэртурал, чичултрал, аьлимтурал, просветительтурал цитатардалгу гьанумур пикри бур Хъунасса Заннайн лаизаву.
КьурбанхIамид Аьлиев увну ур 2003-ку шинал БахIикIуллал шяравасса Аьлил ва Ккурклиясса ­Дианал кулпатраву. Дур ванал назмурдаву кIирагу шяраваллил цIа-кьини бюхттул дуллалиссагу. ­Ватандалухсса, Буттал кIанттухсса ччаву аьч хъанай дур авторнал цайми назмурдавугу.
Барча уллай буру КьурбанхIамид цалчинсса жуж буккаврищал.Хъиндайдихьу хьуннав, кьалан байл хьуннав, чичлансса гьавас къалещаннав.