ЦIуссалакрал ва Гьамиящиял школардай

Дагъусттаннал Халкьуннал Мажлисрал, законнал, паччахIлугърал строительствалул, кIанттул цилакаялувшиврул ва регламентрал комитетрал хъунама Артур Исрапилов цIусса дуккаврил шин дайдихьлахьисса ЦIуминалийсса ЦIуссалакрал гимназиялийсса шадлугърай гьуртту хьунни. Ванал школалун пишкаш дунни спортрал инвентарь.
– На вай нара школалун дуллусса оборудование учительтурангу, дуклаки оьрчIангу мюнпатсса дикIанссар тIисса умудрай ура. Бусравсса ва давриву школалул коллективрангу тIайлабацIу чIа тIий ура, – увкуна ванал. Гимназиялул коллективрал барчаллагь увкуна Артур Исрапиловлухь ххуйсса ссайгъатирттащал учIаврихлу ва учительнал даврин лавайсса кьимат бищаврихлу.
Вара кьини депутат ЦIусса­лакрал райондалул хъунама МамматIи ХIамзатовлущал, ванал хъиривчу Рустам Сулаймановлущал ва КIулшиву дулаврил управлениялул хъунмур Светлана Къудаеващал архIал ивунни Гьамиящиял школалул дуклаки оьрчIру барча бувангу.
Гьашину ва школалий дук­лантIиссар Палестиннавасса 75 оьрчI. Артур Исрапиловлул дяъвилул къавгъарду сававну Ватан кьаритан багьсса Палестиннал оьрчIаха дагьайкунсса къулагъас дикIантIишиву бувсуна.

Аьхъардал школалий

Дуккаврил шинал дайдихьулий щалагу билаятрай цIусса дуккаврил шин дайдишай КIулшивурттал кьинилул байрандалун хас дурну. Лавайсса даражалийсса хIадуршиннардащал дуккаврил шин дайдирхьунни ЦIуссалакрал райондалийсса Аьхъардал школалий. Гьашину ва школалий цалчинмур классравун кьамул бунни 25 оьрчI.
ЦIусса дуккаврил шинащал оьрчIру барча буван Султан Мусаевлул цIанийсса школалийн бувкIуна ЦIуссалакрал райондалул Культуралул, спортрал ва жагьилтурал политикалул управлениялул методист МахIач Акаев, шяраваллил администрациялул бакIчи ГъазимахIаммад ХIасан-ХIусайнов ва ванал хъиривчу Сабир ХIасанов, СВО-лул гьурттучи Эльдар Ильдаров.
КIулшивурттал кьини оьр­чIахь барча дуллай, ихтилат бувна школалул директор Светлана Маммаевал.
Дуккаврил ххуллий цалчинсса шаттирду ласласисса мюрщултрахь бувсуна цуксса гуж ва чани буссарив дуккавриву, чIа увкуна дуккавриву ва спортраву хьхьичIуннайшивуртту.
ОьрчIахь дакIний личIансса насихIатру буллалисса ихтилатру бувна МахIач Акаевлул, ГъазимахIаммад ХIасан-ХIусайновлул, Эльдар Ильдаровлул.

ГьунчIукьатIрал школалий

Лахъа-хъунсса даражалий хьунни ГьунчIукьатIрал дянивмур даражалул школалий КIулшивурттал кьинилуцIун дархIусса шадлугъ. Ва, хIадургу дурну, дачин дурну бия 11-мур классрал дуклаки оьрчIру.
Дуклаки оьрчIахь, вайннал учительтурахь ва нитти-буттахь цIусса дуккаврил шин барча дуллалисса ихтилатру бувна ГьунчIукьатIрал дянивмур даражалул школалул директор Малик Къушиевлул, Лакрал райондалул администрациялул вакил КьурбанмахIаммад Дандамаевлул, школалул завуч Жулиана Штанчаевал, директорнал маслихIатчи, «Движение Первых» жяматийсса суккушиндарал школалийсса отделениялул хъунмур Фатима Ххинчаловал, ГьунчIукьатIрал шяраваллил ккурандалул вакил Зиябуттин ХIажимирзаевлул ва м.ц.
Ларгсса дуккаврил шин марцIсса ххювардай къуртал дурсса оьрчIан дуллуна грамотартту. Вайннавух ия ЯтIул аттестатрай 9-мур класс къуртал бувсса Султан Кьурбановгу.
ГьунчIукьатIрал школалий ва дуккаврил шинал 1-мур класс­раву 2 чIивитIу ур, 11-мур класс­раву – 3 оьрчI.
КIулшивурттал кьинилул шадлугърай тIиртIуна ва школалий учительну, директорну зий ивкIсса Аьрасатнал Федерациялул лайкь хьусса учитель Сулайманов Забибуллагь Салманнул арснан цIа кусса мемориал ула. Ва тIитIин бувкIун бия ванал душру, куявтал, гъанчув. Забибуллагь дакIнин утлатисса хъин-хъинсса ихтилатру бувна ванал гъан-маччаминнал, ванащал цикссагу шиннардий зий бивкIсса учительтурал.
Цалчинсса занг рищунсса ихтияр дуллуна 11-мур классрал дуклаки оьрчI МахIаммад Штанчаевлухьхьун ва 1-мур классрал чIивитIу Арина Маммаевахьхьун.
Школалийсса шадлугърайсса линейка къуртал шайхту, цинявппагу лавгуна шяраваллил дязаннив. Шикку язисса педагог, чIярусса шиннардий Гъумучиял педучилищалул директорну, райондалул ОНО- рал хъунаману ивкIсса Дандамаев Аьбдулкьадир МахIаммадовичлун мемориал ула тIитIлатIисса батIаву хьуна. Ванил дайдихьу дурна шяраваллил администрациялул бакIчи МухIад Штанчаевлул. Мемориал ула цурда тIиртIуна Аьбдулкьадирдул арс, шяраваллил бусравсса хъуначу Сократ Дандамаевлул, арснал арс КьурбанмахIаммад Дандамаевлул. Вания махъ бувна Аьбдулкьадир МахIаммадович дакIнин утлатисса хъин-хъинсса ихтилатру.

КIундиннал школалий

Щалвагу билаятрал ду­ккаврил идарарттай кунна, КIундиннал дянивмур даражалул школалийгу дайдирхьунни ЦIусса дуккаврил шин.
Дуклаки оьрчIан дуккавриву тIайлабацIу, паракьатсса аьрщарайсса, някIсса ссавнил лувсса оьрму чIа тIутIисса ихтилатру бувна КIундиннал дянивмур даражалул школалул директор Абакар Гуйдалаевлул, лакку мазрал дарсирал учитель Абризат Шихлаевал, дуклаки оьрчIал нину Гелана ХIусайновал ва цайминнал. Райондалул администрациялул чулуха шадлугърай гьуртту хьуна ХIажи Чавтараев. ОьрчIру, учительтал ва нину-ппу барча буллалисса, тIайлабацIу чIа тIутIисса ихтилатгу бувну, ванал «Собери ребенка в школу» тIисса акциялул лагрулийсса бахшишру дуруна 1-мур классравун нанисса оьрчIан. Гьашинурив ва школалий 1-мур классравун увкIунни 5 чIивитIу.
Цинявнналагу архIал ххал дуруна «Движение Первых» суккушиндарал каялувчи Григорий Гуровлул цIусса дуккаврил шинацIунсса барча баву дусса видео.

ЧIарттал школалий

Вицхъиял махIлалийсса ЧIарттал урчIра шинал школалул хIаятраву хьунни ЦIусса дуккаврил шинал дайдихьулуцIун дархIусса шадлугърайсса батIаву.
Ва дайдирхьуна Аьрасатнал гимнрахун билаятрал ва республикалул ттугъру гьаз баврийну. Ихтилатру бувна школалул директор Макьсуд Кьадировлул, Лакрал райондалул КIулшиву дулаврил управлениялул вакил АхIмад МихитIаевлул, дуклаки оьрчIал ппу МахIаммад Мирзаевлул ва цайминнал.
Ихтилатругу бия оьрчIан дуккавриву тIайлабацIу, захIмат ххирашиву, учительтуран ва нитти-буттан ссавур чIа тIутIисса.
ЧIарттал урчIра шинал школалий цIанасса чIумал ур 12 дуклаки оьрчI. Вайннавасса 2 оьрчI гьашину 1-мур классравун бувкIсса бур. Цуксса кьурчIинугу, щархъал школардай оьрчIру чан хъанай бур.
Убурдал шяравасса Макьсуд МахIаммадзагьидиновичлул ва школалул директорну 17 шин хъанай дур. Ваниннингу 21 шинал лахъишиврий шиккува завучну ивкIун ур.
ЧIарттал школалий зий ур 4 учитель, 1 библиотекарь.
Учительтал ва дуклаки оьрчIру чаншиврух къабурувгун, шикку чIяруну шайссар личIи-личIисса шадлугъру, оьрчIан кIулшивуртту ва тарбия дулаврихгу хъуннасса къулагъас дуссар.

Бадрижамал Аьлиева