Дагъусттаннай апрельданул 1-нния тиннай зун диркIссар цIудагьаврийн къарщисса ляличIисса режим. Ванил хIакъиравусса хIукмулий къулбас дунни Дагъусттан Республикалул ХIукуматрал председатель Аьбдулмуслим Аьбдулмуслимовлул.
Укунсса режим дикIантIиссар апрельданул 1-нния октябрьданул 31-ннийн дияннин, яни цIу дагьавриясса нигьачIаву яла хъуннасса, гьава кIирисса ва марчру бусса чIумал, цIу дагьаврил хьхьичIалу кьукьаву мурадрай. Ва ппурттуву цIу дагьавриясса мюхчаншивруву ялунсса тIалавшиннарду, къадагъарду дикIантIиссар, вайннувух къавтIи бичаврийнсса, ччимур цIинцI (нигьачIишиврул чулуха ци классрал дунугу) ччуччаврийнсса (так вай давуртту дувансса хасъсса ихтияр, лицензия бусса идарартту хIалами давуртту личIаннин), кьаркьсса урттуцIух цIу щаврийнсса, мукунна багъирдаву, ахъаву, дачардай, вацIлул чIаравсса аьрщарай, оьрчIру бигьалаглагисса ва цаймигу кIанттурдай цIу дагьансса чансса дунугу нигьачIаву дусса давуртту дуллалаврийнсса.
Шагьрурдал ва районнал каялувчитуран маслихIат бувссар:
къуллугъру бувгьуминнал къараллу, дежурстварду, патруллу сакин буван инсантал ялапар хъанахъисса кIанттурдай, цIу къалачIун къаралданийсса къуллугърал зузалт ва волонтерталгу кIункIу бувну вай давурттавун. Агьалинащал дуллан цIу дагьавриясса мюхчаншиврийн тIалавшиннарду дуруччаврийн, къахьунмур хьусса чIумалсса низамрайн, тIайласса къуццу тIутIаврийн дагьайсса давуртту, ихтилатру.
Ларай кIицI ларгсса давурттая гьарта-гьарзану чивчуну буссар постановлениялий цийва.
ЦIу дагьаврил мюхчаншиврул тIалавшиннарду лиян дурсса кIанттурду хIисав хьурча, чара бакъа баян буван аьркинссар Аьрасатнал МЧС-рал Дагъусттаннайсса ГУ-рал «вихшалдарал телефондалийн» ва номерданий оьвкуну: 8(8722)39-99-99.
ЦIу ларчIсса ишру хьусса чIумал – экстренный къуллугъирттал цасса 112 номерданийн оьвкуну.
Бадрижамал Аьлиева
