Январьданул 30-нний МахIачкъалалив хьунни Дагъусттаннал культуралул зузалтрал профсоюзрал даврил хIасиллу дуллалисса ва Профсоюзрал комитетрал председатель увчIлачIисса VII конференция. Ва дачин дурну ия Дагъусттаннал профсоюзирттал организациярттал союзрал председательнал хъиривчуМаксим ХIасанов.
Конференциялийн увчIуну ия 49 делегат: культуралул циняв отраслирдал, Дагъусттаннал миллатирттал ва Ссихьрал театрдал, филармониялул, искусствардал школардал, СМИ-лул вакилтал. Вайннавух бия Аьрасатнал халкьуннал артистътал (4), Аьрасатнал лайкь хьусса артистътал ва Аьрасатнал искусствалул лайкь хьусса ишккаккулт (4), Дагъусттаннал лайкь хьусса учитель (1), Дагъусттаннал лайкь хьусса артистътал (4), Дагъусттаннал халкьуннал артистътал (7), Дагъусттаннал культуралул лайкь хьусса зузалт ва искусствалул лайкь хьусса ишккаккулт (11), Дагъусттаннал ихтиярду дуруччай органнал лайкь хьусса зузала (1), Дагъусттаннал госслужбалул лайкь хьусса зузала (1).
2020-ку шиная 2025-ку шинал январданийн бияннинсса чIумуй Дагъусттаннал культуралул зузалтрал профсоюзрал дурсса даврил жям дуллалисса ихтилат бунни Культуралул зузалтрал профсоюзрал председатель Марзижат Буттаевал. Цила ихтилатраву ванил кIицI лавгунни мудангу гьаз буллай бушиву культуралул зузалтрал ихтиярду дуруччаврил, миннал харжру гьаз баврил ва даврил шартIру къулай даврил масъалартту.
Контрольно-ревизионный комиссиялул даврил хIасиллу дурну махъ, цинявппагу рязину, Культуралул зузалтрал профсоюзрал хъунмурну цIунилгу бувчIунни Марзижат АхIмадовна.
Ва барча буллалисса ихтилатру бунни ревизионный комиссиялул председатель, Дагъусттаннал лайкь хьусса артистка Элла Прускинал, П.Чайковскийл цIанийсса 1-мур оьрчIал искусствардал школалул директор Саида Исмяиловал, полициялул полковник Хасайбат Валиевал, Лакрал театрданул хъунама режиссер Аслан МахIаммадовлул, Оьруснал театрданул артистка Любовь Даниловал ва м.ц.
Цинявппагу ихтилатчитал кIицI лаглай бия Марзижат АхIмадовна аякьа дусса, дакI цIуцIисса каялувчи, бургъил тIиму кунмасса, чани ва гъилишиву нанисса инсан бушиву, ва лайкьшиву уттиния тихунмайгу Культуралул зузалтрал профсоюзрал хъунмурну бикIан. Цала зумуну балайлийну барча бунни Марзижат АхIмадовна Дагъусттаннал артистътал Зайнаб Абсаматовал, Зоя Чунаевал ва Ххадижат Ибрагьимовал.
Марзижат АхIмадовнал дакIнийхтуну барчаллагь увкунни цийнна дурсса вихшалдарахлу ва тIааьнсса мукъурттихлу. Махъ буллунни цийнна дурсса вихшала лайкь дан.
Жугу барча буллай буру Марзижат АхIмадовна укун лахъа-хъунну цIунилгу цила къуллугърайн бувчIаврищал.
КIицI лаган, политикалул элмурдал доктор, профессор Марзижат Буттаева каялувшиву дуллай буссар Дагъусттаннал культуралул зузалтрал профсоюзрай 2015-ку шиная шихунмай.
Андриана Аьбдуллаева
