Сентябрьданул 2-нний СунбатIуллал школалий хъуннасса тя­хъашиву дия. Шикку цIусса дуккаврил шинан хасъсса Цалчинсса гюнгутIул байран дия. Тяхъашиврийн бавтIун бия дуклаки оьрчIру, нину-ппу, муаьллимтал, тамашачитал.

Ларгсса дуккаврил шинал хIасиллая ва цIусса шинан хасъсса масъаларттая ихтилат бувна Ккуллал школалул директор Роберт Саймаевлул. Хъирив ихтилатру бувна райондалул Халкьуннал собраниялул председатель Гъази Оьмаровлул, шяраваллил бакIчи Рамазан Бугъаевлул, райондалул «Движение Первых» суккушиндарал хъунама специалист Руслан Къулиевлул, муаьллимтурал наставник МахIмуд Аьлиловлул, 1-мур классрал дуклаки душнил ниттил Надежда Бугъаевал, байбихьулул классрал муаьллим Зоя Аьбдуллаевал, оьрус мазрал муаьллим Бэлла МахIадовал. Школалул директорнал дуллуна грамотартту спортраву, жяматийсса иширттаву хьхьичIун ливчу­сса дуклаки оьрчIан ва душваран, муаьллимтуран. Бивщуна Цалчинсса гюнгутIи, 1-мур ва 9-мур классирттал оьрчIал ва душварал дурккуна назмурду, бивзуна къавтIун.

Хъирив, дуклаки оьрчIругу бавтIун, Руслан Къулиевлул дурна ххуйсса, мяъна дусса хьунабакьаву. Ваний гьуртту хьуна муаьллимтал, бувсуна хъирив нанисса ник патриот зумуну тарбия даврия, Буттал кIану буруччаврия.
Ва дуккаврил шинаву школалийн занай бур 24 оьрчI-душ, вайннава 1-мур классравун – 5.

МахIмуд Аьлилов