ЦIуссалакрал райондалийсса Аьхъардал школалий 3-мур классрал дуклаки оьрчIахь Чувшиврул дарс дирхьунни. Ши­кку гьуртту хьунни хасъсса аьралий операциялия шавай игьалаган увкIсса, Минкаиллул арс Назар Сулайманов. Ва классраву дуклай бур Назардул душ Самирагу.

Чувшиврул дарс хас дурну дия Аьрасатнаву баян бувсса Ватан дуруччул шинан. Ванил агьаммур мурадгу хъанахъиссар ялун нанисса ник Ватан ххирану, тарихрал кьимат буну тарбия даву.
Дарсирай оьрчIахь балжину бувсунни Украиннал аьрщарай неонацизм духлаган даву мурадрай баян бувсса хасъсса аьра­лий операциялия, цалчинсса гьантрая байбивхьуну, аьралий буржру лайкьну бартбигьлагьисса, мобилизоват бувсса, контракт чирчуну ва хушрай лавгсса аьралийтурая.
Назар Сулаймановлулгу бувсунни аьралитурал дуллалисса къучагъшивурттая:
– Жула аьралийтал буссар къучагъну талай, Ватандалул мурадру дакI тIайлану бартбигьлай. Вайннал тасттикь бунни цивппа кьянкьасса низам дусса, бувсса амру биттур бан хIадурсса патриотътал бушиву. Укунсса къучагътал буссаксса, жула аьрщарайн душманнал ша къабизантIиссар. Щак бакъар ххувшаву жура ласунтIишиврийн, – увкунни ванал.
Назар ур халкьуннал паракьатшиву дуруччаврил цIаний нигь-ццах бакъа талатисса къучагъ, жагьилсса никиран эбратрансса Виричу.
Аьралий бигарду къучагъну бартбигьаврихлу Назар Сулаймановлун дуллуну дур паччахIлугърал ларайсса награда – Къучагъшиврул орден.
Чувшиврул дарсирай оьрчIал суаллу буллунни Назардухьхьун.
Ахирданий цинявннал рирщунни дакIний личIансса сурат­ру.