Лакрал райондалул бакIчи Юсуп МахIаммадов гьуртту хьунни Ханты-Мансийск шагьрулий «Малая Родина – Сила России» тIисса щалагу Аьрасатнал кIилчинмур муниципал форумрал лагрулий «Наследие» темалийн дагьайсса регионал кьинирдай.

Юсуп МахIаммадовлул бусаврийн бувну, «Наследие» форум дан Ханты-Мансийский автономный округ язи дугьаврил дур цила мяъна. Шикку 2025-ку шин баян бувну бур Тарихрал ирсирал шинну.
— Форумрай ххал бигьлай бия муниципал сообществарттал куннащал кув уртакьну зузаврийн, даврил опыт кIибачIаврийн ва оьрмулул даража лавай баврийн багьайсса агьамсса суаллу. Мероприятиялул лагрулий муниципал сообществарттал вакилтурал ккаккан дунни проектирдал сиптарду.
Ми сиптарду цирдагу дия ­Аьрасатнал мюрщисса шагьрурдал ва щархъурдал тарихрал ва магьирлугърал ирс ябаврийн дагьайсса.
Ххал бивгьунни территорияртту хьхьичIунмай баврийн багьайсса суаллу, жула билаятрал ляличIишиву ва аслийшиву ядан кабакьу баврил ххуллийсса проектру. Хаснура къулагъас дурну дия магьирлугърал ирс ябавриву кIанттул сообществарттал дуллалисса даврих ва чIиримур Ватан хьхьичIуннай дансса шартIру хIасул даврих.
Форум нанисса кIирагу кьини агьамсса шаттирду лавсунни жула билаятрал яла хъунмур ххазина – мунил тарих, аьдатру ва магьирлугъ ядаврил ва гьарза даврил ххуллий. Махъ бакъа, ва форум хьуссар цIу-цIусса пикрирду ва проектру дузрайн буккан бансса таргну.
ДакIнийхтуну барчаллагьрай ура Республикалул бакIчи Сергей Меликовлуйн, ттуйнна вихшалагу дурну, ва форумрай гьуртту хьунсса сант дулаврихлу.
Зулайхат Тахакьаева