Хъаннил байрандалул хьунийн Лакрал райондалул бакIчи Юсуп МахIаммадов хьунаавкьунни хасъсса аьралий операциялий талатиминнал ниттихъащал ва хъаннищал.

Хьунабакьаврий гьуртту хьунни Лакрал ва Ккуллал районнал аьралий комиссар Аьли ГъазимахIаммадов ва «Память гор» жяматийсса организациялул хъунама Юнус Эфендиев.
Юсуп МахIаммадовлул барча бунни хъами ялун нанисса байрандалущал. КIицI лавгунни, кулпатрахсса ва оьрчIахсса аякьа асар хъанай, жула аьралитал сивсуну талай бушиву хьхьичIххуттай, хIакьину райондалул администрациялул хьхьичI бивхьусса агьаммур мурад бушиву хасъсса аьралий операциялий талатиминнал кулпатирттал чIарав бацIаву.

«Къалякъинссар арс аьрай усса ниттил дард-хажалат куклу дансса махъру. Зул арсру ва ласру, цала жаннай хIайп къакуну, ватандалул мурадру буручлай буссар. Зун гьарцаннун чIа тIий ура ссавур, дакIнил кьувват! Зу зувалу бакъассару. ДакI дарцIуну ура зул аьзизми сагъ-саламатну ххувшаврищал зана хьунтIишиврий», – увкунни Юсуп МахIаммадовлул.

Аьралийтурал ниттихъул ва хъами барча бунни Аьли ГъазимахIаммадовлулгу. Ванал кIицI лавгунни Аьрасатнал президент Владимир Путин, хъуннасса къулагъасгу дуллай, чIарав ацIлай ушиву хасъсса аьралий операциялий талатиминнал. Бувсунни укунсса кулпатирттал чIарахбацIулунсса давурттая.

КIицI лавгунни Дагъусттаннай хъуннасса даву дуллай бушиву ватандалул ххуллий жанну дуллуминнал аьпа абад баврил цIаний. Аьралитурал ниттихъахь ва хъаннихь байран барча дунни Юнус Эфендиевлулгу.

Зулайхат Тахакьаева