Августрал 29-нний  МахIач­къалалив, Миллатрал библиотекалуву, Дагъусттаннал язисса арс, патриот, паччахIлугърал ва жяматийсса ишккакку, меценат, «Дагэнерго» ОАО-лул гендиректорну зий ивкIсса ХIамзатов  ХIамзат дакIнин утлатисса мажлис хьунни. 

Ванал оьрмулул ва даврил ххуллия бусласисса «Созидатель» тIисса луттирал презентациягу дунни.
Ва мероприятие дачин дурнугу бия кIицI лавгсса лу итабавкьусса «Эпоха» издательствалул директор Ххадижат Курахова.
Республикалул энергетикалул ва тарифрал министр Марат Шихаьлиевлул кIицI лавгуна ХIамзат ХIамзатовлул каялувшиву дуллалисса ппурттуву «Дагэнерго» Аьрасатнал билаятрал хьхьичIунми предприятиярттавух диркIшиву, ванал каялувшиву дуллалисса чIумал бугу-бувну, зузи бувну бивкIшиву ЧиркIайннал, Миатлиннал ва Гъуниннал ГЭС-ру. Изобразительный искусствардал музейрал хъунмур СалихIат ХIамзатовал кIицI лавгуна халкьуннал шаэр Расул ХIамзатовлул аьпа абад баврил ххуллу-ххуттай ХIамзат ХIамзатовлул хъуни-хъунисса давуртту дуршиву, вайннуцIун Москавливсса ва МахIачкъалаливсса гьайкаллу дацIан давривугу бутIа бивхьушиву.

Сенатор Илияс Оьмахановлул бувсуна ХIамзат ХIамзатовлущалсса дусшиву, тIааьнсса асардал дурцIусса душивруцIун, дарсну хьуссагу диркIшиву, бакIрайн лавсмур бартбигьайсса, буллусса мукъул заллушиву дувайсса дус ивкIшиву.
«Дагестанский аул» музей-заповедникрал директор Зумруд Сулаймановал кIицI лавгуна, культуралул проектирдацIун, ХIамзат ХIамзатовлул хъуннасса къулагъас диркIшиву социал проектирдахгу. «Бургъил зума» тIисса лагерьгу ванал хIарачатрайну бувшиву, чIярусса щархъурдугу ттукIлил дузал дуршиву.
Архитектор, «Ватан» мемориалданул комплексрал автор МахIаммад-Кьурбан Керимовлул бувсуна ХI. ХIамзатов ччянива хияллай ивкIшиву Надир-шагьнал аьралуннащалсса талатавриву ларсъсса ххувшаву абад дансса даву дуван, «Ватан» комплекс баврийну му мурадгу дузрайн буккан бувшиву.
ОьрчIансса чичу, педагогикалул элмурдал доктор, профессор Наира Алидеслул бувсуна издательствалул даву гьаз давриву, хаснува оьрчIансса литература хьхьичIуннай даврицIун кабавкьусса инсан ушиву. Махъру лавхъуна, Москавливсса «Дагъусттан» Культуралул центрданул президент, профессор Арсен ХIусайновлул, Аьрасатнал Конституцион Судрал судияну зий ивкIсса, цIанакул Санкт-Петербурглив университетрал (НИУ ВШЭ ) юридический факультетрай зузисса профессор ХIадис ХIажиевлул,  ДГТУ-лул кьатIаллил билаятирттал мазурдил кафедралул хъунмур, чичу, публицист  Жанна Абуевал, Ниттил мазурдил фондрал каялувчи Аьли Камаловлул ва цаймигу бусравсса инсантурал.
Ахирданий ХIамзат ХIамзатовлул арснал, Тимурдул, «РусГидро» ПАО -лул Дагъусттанналмур филиалданул хъунаманал барчаллагь увкуна бавтIцириннахь ва «Созидатель» луттирал автортурахь: Сатар Амировлухь, ПатIина Варисовахь ва Ххадижат Кураховахь. ЧIярусса суратругу дусса ва лугу Дагъусттаннал тарихрая бусласисса луттиран ккалли буварчангу тIайлашиву хьунссар. Ваниву биялсса бутIа лакралгу бур – кIава ХIадис ХIадисовлул, Жанна Абуевал, МахIаммад-Кьурбан Керимовлул макьаларттугу дур.
Дуснаясса макьалалуву Ссапарбаг Аьбдуллаевгу буслай ур, Гъумук Хан-Муртазааьлин гьайкал дацIан дуллалисса чIумал, ва Надир-шагьнал аьралуннаяр ххувшаву ласавриву цалвамур миллатрал кIану хьхьичIунмай бан хIарачат буллалиминнахьсса махъ хIисаврай, ХIамзат ХIамзатовлул гьайкал тIитIлатIисса мероприятиялий кьянкьану ва аькьилну увкуну бивкIшиву: «Ххувшаву ларсъсса Дагъусттаннал халкьунналли! Къаяруссаннал ва къалакраллича, Дагъусттанналли!».
Вана укун куртIну пикри байсса аькьилгу, хъунасса патриотгу, интернационалистгу, насихIатчигу, вихшаласса дусгу, сахаватну ка кIидахIайсса инсангу ия тIий бия чIявуми та кьини, ХIамзат ХIамзатов дакIнин утлай.
ПатIимат Рамазанова