Вай гьантрай Новостройрай, ЦIуссаккуллал шяравусса «Непоседа» тIисса оьрчIал багъраву, хьунни «Аьпалул багъ» акция. Шикку гьуртту хьунни оьрчIал багърал зузалт, нину-ппу, хасъсса аьралий операциялий жанну дуллусса ЦIуссаккуллал шяравасса аьралитурал нину-ппу ва гъан-маччами.
Мероприятиялий хъуннасса хъар лархъунни оьрчIал багърал хъунмунил хъиривмур,1999-ку шиналсса дяъвилул иширттал гьурттучи, Чувшиврул ордендалул заллу Полина Халиловал.
Акция тIитIлай, ихтилат бунни оьрчIал багърал хъунмур Фарида Базановал. Ванил бувсунни Ватан дуручлай дяъвирдай жанну дуллусса шяраваллил цинявппагу къучагътурая, хасъсса аьралий операциялий хьхьичI ххуттай бавцIуну талатисса аьралитурая, миннал чувшивурттая.
Акциялул лагрулий Буттал кIанттул цIанийсса Хъунмасса дяъвилий, 1999-ку шиналсса дяъвилул иширттаву ва хасъсса аьралий операциялий жанну дуллусса вирттаврал аьпалун бувгьунни 20-нния ливчусса мурхьру.
Хасъсса аьралий операциялий жанну дуллусса аьралитурал: Рамазан Бахалаевлул, Кьурбан Кьурбановлул, Аьбдулла ХIасановлул ниттихъалгу арснал оьрчIащал архIал бувгьунни аьпалул мурхьру.
Хъирив цинявннал ххал бунни ЦIуссаккулатусса хасъсса аьралий операциялул гьурттучитуран хас бувсса ОьрчIал багърал музей.
Хъирив багърал оьрчIал дурккунни къучагътуран хас дурсса назмурду, увкунни балайрду. Коллективрал чулуха хасъсса аьралий операциялий жанну дуллуминнал ниттихъан дунни бахшишру.
Андриана Аьбдуллаева
