ЧIяйннал Магьирлугърал къатлул хъунмур СалихIат Алхасовал каялувшиннарай хьунни «Время выбрало вас» тIисса цIанилусса, интернационал бурж лахълай бивкIсса Аьралитуврал кьинилун хас дурсса акция. Акциялул лагрулий СалихIат ва «ЧаннацIуку» кказитрал корреспондент Арсен Аьбдуллаев бивунни Украиннал аьрщарай нанисса хасъсса операциялий гьуртту хъанахъисса ЧIяйннал шяравасса Нариман МахIаммадаьлиевлул нитти-буттачIан.

Украиннал аьрщарай хасъсса операция бачин бувния шийнай Бухариннул ва Сонял арс Нариман лайкьну бартбигьлай ур аьралий бигарду.
– БувчIлай бур цуксса захI­матну буссарив арсру аьралий операциялийн тIайла бувксса нитти-буттачIан. Ватандалул мурадру буручлай, гьур­тту хьун лавгсса цинявппагу жагьилтал Заннал бурувччуну лякъиннав. «Ватан» ва «Ххувшаву» тIисса мукъурттил мяъна духлагантIиссар, агана дунияллий Ватан ххирасса, мунил цIаний бацIан хIадурсса чиваркI бакъахьурчан. Ватандалийн кьини дурксса чIумал хъиннува бувчIлай бур жула жагьилтал кунма къучагъсса ва чумартсса цайми бакъашиву. Аьра­сатнал билаятран чIа тIий бура, ччясса мутталий фашизм ва нацизм духлаган дурну, Ххувшаву ласаву. Цинявппагу жула оьрчIру сагъ-саламатну зана хьуннав цала нитти-буттачIан, кулпатирттачIан, – увкуна Са­лихIатлул.

Хъирив ихтилат буллалисса Арсен Аьбдуллаевлул дакIнийн бивчуна авгъан дяъвилул тарих.
– Авгъанисттаннай 1979 шинал декабрь зурул 27-нния 1989 шинал февраль зурул 15-ннийн бияннин (9 шин, 1 барз ва 18 гьантлий, яни 2238 кьини) дяъви най бивкIссар. Та дяъвилия зана къавхьуссар 14 азарунниха ливчусса жула офицертал ва аьралитал, 6 азарахъул ливтIуссар щавурду дирну ва къашавай хьуну, 311 аьраличув ятIа-тIар бакъа ливчIссар. 2958 дагъусттанлувнан нясив хьуну бур авгъаннал дяъвилул цIараву талансса. Му дяъвилий тамансса жагьилтал гьуртту хьуссар жула шяравагу. Дагъусттаннал жагьилтал къучагъну талай бивкIссар авгъаннал дяъвилийгу, цIанагу жула оьрчIру хасъсса операциялий лайкьну бартбигьлай буссар аьра­лий бигарду.
ХIурмат бусса Бухарин ва Соняй! Барчаллагь зун къучагъсса арс тарбия аврихлу. Ххувшавугу ларсун, цIуллуну-сагъну зана хьусса чIун дучIаннав!» – увкуна Арсен Аьбдуллаевлул.
Ванал ихтилат къуртал бувна аьралитураха цала чивчусса мукъурттийну.

Хъунисса махъру буслай,
Пахрурду къабуванна,
Аьрай талайсса Вирттал,
На зул хьхьичI икрам банна!

Имара Саидова