Маннархъал Мусаха
КIиямаксса оьнтIуллув,
КIамаксса халкьуннаву
ХIакьсса нарт хьунна ина,
Лахъ бувну миллат вила.
Агь, машАллагь, машАллагь,
МашАллагь, Маннар Муса!
Аспироз, Мирихрайнгу
Левххун найгу ккакканнав!
Агь, барчаллагь, барчаллагь,
Барчаллагь, Маннар Муса!
Аспироз, Мирихрайнгу
Левххун найгу ккакканнав!
Дякъил ккарччив хъякусса
КIи дайдихьулул кьини,
Инт дучIаншиву буслай,
Космосрайн левхсса читIуй.
ЦIурттал хъюрдайнсса ссапар
ТIайлабацIусса хьуннав!
Ина лавгсса магистраль
ХъункIултIутIан ххяхханнав!
Хор дунни Ккавкказуллал
Зунттал, ардал, хьхьирирдал:
–Жул лачин – ххира Муса!
Жул пахрур – Маннар Муса!
Мурад чаннар ниттихъал:
ХIурмат лахъсса наслу бан!
Хиял лахъри душваврал:
Ссав мютIи дай арсру бан!
Агь, машАллагь, машАллагь,
МашАллагь, Маннар Муса!
Аспироз, Мирихрайнгу
Левххун найгу ккакканнав!
Агь, барчаллагь, барчаллагь,
Барчаллагь, Маннар Муса!
Аспироз, Мирихрайнгу
Левххун найгу ккакканнав!
Ю. Хаппалаев
Ххуллухъин баннав, Мусай!
ЦIарал буран ххурхху тIий,
ЦIусса жами лавсун най,
Хъирив бурувгсса жугу
Циняв буру ссавруннай!
Ххуллухъин баннав, Мусай,
Мяйлчинмур ссавний хъянгу,
ЛухIи-цIансса аьламрал
ЦIаннай чани лахъангу!
ЦIакьсса бур вил гьалмахтал –
Оьрус миллатрал арсру,
Ларайсса дур кIулшигу –
Та Гагариннул дарсру.
Левххун най ура ина –
Туннурдаву оь бацIлай,
Дагьну нани аьрщарал
КIушиву къюкIлийн дагьлай.
Левххун най ура ина
Муххал ва цIарал щютIлий,
ЦучIав щак тIий къаитан
Зунтталчунал бюхъулий.
БикIувча му гьунаргу
ОьрчIал оьрчIахъай буслан:
Хъиннува бюхттул бунни
Ина жула Дагъусттан.
Ххуллухъин баннав, Мусай,
Мяйлчинмур ссавний хъянгу,
ЛухIи-цIансса аьламрал
ЦIаннай чани лахъангу!
М-З. Аминов
ЦIурттаяр бюхттул дунни
ОьрчIал цайнува цала
Цалчинмур ша лавсукун,
Га ххаришиврун лавсъсса
Ша хьуннавча увкуну,
ШанбачIулий бачIлансса
Бакъухърал аьму байсса
Аьдат дур жула лакрал.
Мусай, ина космосрайн
Цалчин левххун лавгукун,
Вил дакI кьянкьашиврия
Ххарисса Дагъусттаннай
Бакъухъирттал бушкъапру
Дурхьунссар гьарца тIювай.
Уттинин ина ияв
Ххираманахъал арсну,
ЧIаххувсса щархъангума
Муксса акъаяв кIулну.
Аьрщарая гьаз хьуну,
Левххун лавгун космосрайн,
Утти кIура авунна
Дунияллул вакилнайн.
Хъунзунттуя я бивтун,
Янин ххал къашайнугу,
Ххал хъанай ура цIана
Гьарнан цала къатлуву.
Дунияллийсса мазру
Циняв вин къакIулнугу,
Тти цинявннан бувчIлай бур
Му вил зумату бувкмур.
Ссирссилттайх кахгу куну,
Левххун лавгун цIурттачIан,
ЦIурттаяр бюхттул дунни
Вила ва миллатрал цIа.
Чичлай бур шаэрталгу
Барчаллагьрал балайрду,
Къахьунххурав ттулмургу
Ми балайрдал ца ххану.
Н. Юсупов
Барчаллагь вин, Мусай!
Барча хьуннав ЦIусса шин,
ЦIурттачIа хьунадаркьсса,
Дагъусттан бюхттул бувсса
БакI аькьилсса лаккучу!
Зунттаха ххал къашайсса,
Вил буттал шяравалу
Щаллара дунияллун
Ина ккаккан дурунни.
ЧIявуссаннан къакIулсса
ЧIивисса лакрал миллат
Щалвава ил-аьламрайх
Ина машгьур бувунни.
Агь, барчаллагь, барчаллагь,
Аслансса гьухъалий оьрчI,
Ссавнийн лахъавунияр
УчIаву шадсса хьуннав!
М. Щурпаева
Аврав, зунттал виричу!
Космосраву чIун дурккун,
Ссавнил жами ливккун най,
Вих ялугьисса жугу
Циняв буру шадлугърай.
Ххуйсса дагьаннав санти
Ссаврунная учIансса,
Бигьасса хьуннав ххуллу
Оьллаарив учIансса.
Аврав, Маннархъал Мусай,
Аврав, Гъумук шагьрулий,
Барзунттал бакIру кунна,
ДакIру бюхттулсса чулий.
Ина кIа аьламраву
Ца шин дунни диялсса.
ХIасул бунни хаваргу,
ОьрчIал оьрчIай личIансса.
Биттур бунни багьайкун
Ватандалул бивхьу бурж,
Ккаккан бунни илданун
Вила духIиндарал гуж.
Ца гъили баргъ бивтунни
Утти зунттайх тяхъану,
Зунттал чув ина увкIун
Му гъили баргъ архIалну.
Къаляхълай бур учин махъ
Вил чувшиврун лавхьхьусса –
Барчаллагь нитти-буттан,
Мукунсса арс хъун увсса.
Хьурдай хъузалал каних,
Мусай, вил ка чIуен дан,
Хьурдай ссавнийсса баргъгу
Вийн икрамрай бацIан бан!
Аь. Исмяилов
Маннархъал Муса
Аьршлувату чавхь кунни
Зунттал бявкъу щаращи,
Аьзизсса Буттал Ватан
Зара дизан дурунни.
Бюхттул зунттал чинарду
Вийн икрам буллай бури,
Ардай гуламан-тIутIив
Виха назмурдай дури.
Пахру циван къабанна,
Аьзизсса нину – Ватан,
Вил язисса виричу
Чанна цIурттайн гьаз хьувкун.
Зунттаву шагь ВацIилуй,
Алвагь циван къахьунна,
Бюхттул барзунттал гьалбарцI
Аьламравух левххукун.
Аллагьнал хIикматшиву
Загьир дан ччан диркIукун,
Хъатуксса аьрщарая
Муса ссавруннайн левхри.
Буттал кIанттул виричув,
Чувшиву ххисса лачин,
Лачиндалулгу гьунар
Бюхттулний кюру бавур.
Гьунар ххисса къиргъулул
Гьаваллава ав бугьай,
Вил аькьлу камил бакIрал
НякI ссав язи дургьунни.
Бюхттулнийх гьава байсса
Туйгъун лелуххи куна,
Гьава бувну лавгунна
КIа арилчинмур ссавнийн.
БакIравусса аькьлугу
Кьиматрай ишла бувну,
Жавгьарданул кьаламрах
Чивчунни мусил ххару.
Сир магьилул кIиссурттал
Варакьрал ххару чичлай,
Ина гьай-гьайтIи дунни
КIай мармарчарил ххяллу.
Вил баймургу бюхъаннав,
Бувмур чивун букканнав,
Вил алвагь дикIул дакIний
Геройнал лишан хьуннав.
Лухччи уксса кIу хьуннав
Ссав уксса бюхттул хьуннав,
Ина тIиний Зал хьуннав,
Зал тIиний кIини хьуннав.
Гь. Жалалова
КIийн нанима лас ччива
ЧIа тIий ура Муса Маннаровлул
ниттин ва кулпатран
Ссавний Гагарин ия
Дунъяллул лагма уклай.
Щяв, шилу, циняв бия,
ТIанкIа тIий, ххарил лехлай.
Та кьини, кьунниялай,
Душ бия щар хьуну най.
КIийн нанима лас ччива,
Та жалин-душнил тIива.
Шин космосраву дуртун,
Цув цIуллу-сагъну ия,
Жип чанна цIурттал дурцIун,
КIа щяв ликлан най ия.
Хьуна арснан кьура шин,
Аргъирай бия жалин,
КIия увкIма арс ччива,
Та жалиндалул тIива.
Кьамул бувунни дакIнил
Дагъусттан зунттал душнил
Гьан итан лас аьрххилий,
Нигьал ва хьуллил хьунийн.
ХьунтIиссар ссавургу дан
Ниттища, учIаннин арс,
Лавсун жунма ссайгъатран
Ссавнияту баргъ ва барз.
А. ХIусайнаев
Пахру ба, Лакрал улчай
Вил миллат чансса бур, цIа машгьурсса дур,
Машгьур дан бюхъайсса буну тIий вирттал.
Пагьму-гьунардугу лап бусравсса бур,
Бусравшиву кIулсса буну тIий нартътал.
ХIавинахъал Саэд, Саэдхъал Гьарун,
Инкьилабрал аьскар – миннал гьалмахтал.
Мусил цIуртти лавсъсса ххюя лаккучу –
Лайкьссар вин пахру бан, ттул Лакку улчай.
Зунттал барзул биза ссурула бувну,
Ссав хIайран дуванну лахъну тIанкI дурну,
Дуниял мяш хьусса гьунар бувусса
Аминтахъал Наби – гьарнансса пахру.
Ссавруннал пагьламан АхIмад-Хан Султан,
Душмантал къир байсса къучагъсса инсан:
Гьаваллавн гьаз хьусса кIул шайхту лачин,
Уххан кIану бакъа личIайва язид.
Космосравун левххун, таварих чичин,
Хьул бивхьу умудрал мурадрайн иян,
Тавба дурну увкIсса Маннархъал Мусай,
Ина гьаз дунни сий лакрал миллатрал.
Къапихъал Апанни сагъну уния,
Санаъ дуванссия назмурдал чарслуй,
Чаринхъал МухIуттин изан увния,
Мажлис батIинссия лакрал вирттаврал.
Ж. Дагъирманов
