Ккуллал райондалул вив най дуссар 3 журасса гуж бусса токрал ххаллу. Муххал вышкардайх най буссар 35 азарва вольт. Вай ххаллу дуруччаврил утташиву дуссар 15 метра ххаллачIату ца-ца чулухуннай. Вай ххаллачIан гъан хьурча, 0,6 метралул манзилданийх токрал дуга рирщуну утайссар.
Ваччавсса подстанциялия шяраваллавун, фермардайн тталлайх най дуссар 10 азарва вольтрал гужшиву дусса токрал ххаллу. Вай ххаллу дуруччаврил утташиву хъанахъиссар 10 метра ца-ца чулиннай. Вай дурцун щяв дагьну духьурчан, ток къалевщуну вайннучIан гъан хьун къабучIиссар 8 метралул манзилданий, гъан хьурча шаговый напряжениялул утайссар.
Гьарца шяраваллавусса трансформатордая нанисса ххаллавух най буссар 380 вольтрал гужшиву дусса токрал ххаллу. Вай ххаллу дуруччаврил утташиву хъанахъиссар 2 метра гьарца чулиннай.
Гьарица абонентначIан тталлая най буссар 220 вольтрал гуж бусса токрал ххаллу. Вай ххаллая инсаннал оьрмулун хъуннасса нигьачIаву дуссар. Мунияту чув-дунугу ва гужшиврул ххал дурцун дагьну лякъирчан, га аьркинссар ток къабищай дуван. Кьаркьсса ттуршах зарал къашайсса кIанттайн дутан ягу изоляция дусса ручкарду дусса къяцIух ка диллалисса кIанттаяту кьукьин ва баян буван вай номердайн оьвкуну:
88726821277,
89285960118,
89280492121 дежурный диспетчертурайн.
Ток нанисса ххаллал ялув кIицI дурсса утташивурттай къабучIиссар къатри дуллан, бярал, ххалал бакIурду буллан, зунма зарал къахьуншиврул. Фермардай, шяраваллаву ишру хьунни, ххалал бакIурду тталлу вив бивтун чIиртту бувсса, магъив дирхьусса ларзурдал, къатрал тталлу вив бивтун. Вай заллухъруннан предписаниярду дуллуссар ва дулунтIиссар. Мукунма къабучIиссар токрал тталлайсса изолятордайх чартту бишлан, гъагълан, ттупанча битлан, ххаллайн муххал ххаллу дичлан. Мукун зузиминнан цанма зарал шаву дакъагу, агьали ток бакъа личIлачIиссар.
Мунияту, зувагу бурувччуну, цайминнангу зарал къахьунну токрая мюнпат ласияра.
Аьбдул Кьурбанов
Гъумучиял РЭС-рал Ккуллал райондалул сетевой участокрал хъунама
пишакар