Шушиннал школалий хьунни Ххувшаву ларсун 70 шин шаврин хас дурсса, учительтурал ва лавайми классирттал оьрчIал гьурттушинна дурсса конференция. Му даврил сиптачигу, сакиншинначигу бия райондалул оьрчIан цIакьсса ва куртIсса кIулшивуртту дуллалаврицIун, краеведениялул даврилмур хъаргу ларсун нанисса МахIрамова ПатIимат.

ПатIимат тамансса шиннардий Аьхъардал школалий дарсру дихьлай бикIайссия. Жу цимилагу хьуссару ПатIимат Камалуттиновнал сакин дурсса мероприятиярдай, бивссару мунищал ЦIуссалаккуйсса шяраваллавун 1999 шиналсса дяъвилул материаллу датIлай. ЦIанакул му зий бур Шушиннал школалий, краеведениялул кружокрайгу каялувшиву дуллай бур. Зий бур республикалул архиврайгу. Микку зузаврийнугу ванища бюхълай бур цилла датIлатIисса материаллу авадан дуван. ПатIиматлул архивраву дур дяъвилул шиннардицIун дархIусса хъуннасса материал: дяъвилул хроникалул, талатавурттал суратру, фронтраясса бюххансса чагъарду, фронтовиктурал суратру. ЦичIарасса дяъвилул материал ккаккан дуван ва миннуя балжину бусаншиврул школалул директор Абакарова Шакиратлущал сакин дурну дия конференциягу. Хъинну авадансса архиврал материал дия ПатIиматлул хIадур дурну. Школалул коридордануву тIиртIуну дия архивравасса кказитру, суратру, чагъарду ккаккиялун бивхьусса выставка. Гьарца микку бивхьусса чагъарданул ягу суратрал кьадар буслай бия ПатIимат Камалуттиновна. Дуклаки оьрчIру гъирарай вичIидирхьуну бия муних, махIаттал хъанай бия архивравусса документирттаву цала шяраваллил агьулданул, цала буттал буттахъал цIарду ва суратру лякъайхту. ЧIярусса чичрурду ва суратру салкьи хьуну дунавхьур, школданул чIирайн лахъайсса стендгу дурну дия. Школалул директор Абакарова Шакират бур ПатIимат Камалуттиновнал оьрчIру буттал кIану ххирану, патриот асарду хьхьичIунну тарбия баврих хъуннасса къулагъасгу дуллалисса, захIматгу буллали­сса учитель бур тIий. «ПатIимат Камалу­ттиновнал дяъвилул шиннардиясса материаллу райондалул кказитрай ришлан дуллунни, личIи-личIисса районнаятусса чичрурду ва суратру дур, жу ми гъирарай ришлай буру буккултрангу кIулну дикIаншиврул, ПатIимат цуппагу цилла районгу, райондалул халкьгу дакIнийхтуну ххирасса, республикалул тарихгу ххуйну кIулсса инсан бур», — тIий бур райондалул кказитрал редактор Уммугьани ЯхIияева.
Архивравасса документру – тарихрал язими чIапIиври. ЧIумул шиннардил лахъишиврул хъахъи лаган дурсса суратру, кказитру ва чагъарду ххилтIу буллалиний, лавгзаманнущал­сса дахIаврил аьжаивсса илгьан бутай дакIурдивун. Мукун бюххансса, дакIний личIансса асарду кьабивтунни ПатIимат Камалуттиновнал даврил, тIий бур учительтал ва дуклаки оьрчIру.
«Ттун ттулла даву хъинну ххирар, къакIулмур ялун личин буллан, кIулмур авадан буллан гъира бикIай мудангу. Тарих кьиматрайсса ххазинар, му ххазиналул хIурматгу бикIан аьркинссар. Ттулмур мурадгу оьрчIаву ватандалул тарихрах ччаву цIакь давур», — тIий бур ПатIимат МахIрамова.