Апрель зурул 28-нний 37-мур гимназиялий хьунни шагьрулул школардай дуклакисса оьрчIал дянивсса пасихIну лакку мазрай шеърирду буккаврил ва балайрду учаврил конкурс. ОьрчIал назмурду дуккаврил пасихIшиврун ва балай учаврил гьунардан кьимат бишлай бия ниттил маз ва мунил тарих лавайну кIулсса жюри.
Конкурс баврил мурад бия дуклаки оьрчIавун ниттил маз ва лакрал шаэртурал поэзия ва проза лахьхьинсса гъира-шавкь рутаву.
Жула ниттил маз – му миллатрал къюкIри, миллат ябуваншиврулгу буруччин аьркинссар маз, маз бакъахьурча, миллатгу бакъассар. Вана вай махъру тикрал буллай дайдишара на мудангу ниттил мазрал дарсру.
Лакку маз буниялагу бур хъинну авадансса, пасихIсса ва хIикматсса. Мазрал аваданшивугу исват шай жулва чичултрал прозалийну ва поэзиялийну. ХIакьину жу ниттил мазрай гъалгъа тIун, шеърирду буккин конкурсрайн бувцуну бувкIсса оьрчIругу хъинну гъирарай ккалай бия назмурду. Цинявппагу конкурсрай гьуртту хьун бувкIсса оьрчIавугу чIалай бия ниттил мазрах ва культуралух лавайсса гьавас бушиву.
Ва конкурсрай хьхьичIунсса хIасиллу ккаккан дунни 17-мур гимназиялуву дуклакисса оьрчIал: 1-мур кIану бувгьунни, цалва аккордеонгу бивщуну балай увкусса, 8-мур классраву дуклакисса МахIаммадов ЦIаххайл; 2-мур кIану бувгьунни 9-мур классраву дуклакисса Исмяилов ВалимахIаммадлул ва Казиханов Исламлул.
Рязийну ливчIунни оьрчIру ниттил мазрах ччаву рутаву мурадрай бувсса конкурсрая.
ХIажи Амиров,
17-мур гимназиялул ниттил мазрал учитель
