Ларгсса нюжмардий Гъумучиял лицейраву хьунни ДР-лул КIулшиву дулаврил министерствалул буллалисса «Первоцвет» тIисса мюрщими классирттал дуклаки оьрчIал ахттаршиннардал давурттал конкурс.

Зулайхат Тахакьаева
Му сакин бувну бия райондалул КIулшиву дулаврил управлениялул. Конкурсрай гьуртту хьунни 16 школалиясса 18 дуклаки оьрчI. Миннал ахттаршиннардал давур­тту дия «Ттул чIиви миллатрал тарих», «Ттул лагмасса дуниял», «Математика – элмурдал паччахIлугъ», «Элму ва оьрму», «ТIабиаьт – кIулшивурттал щаращир» ва цаймигу темардан хас дурсса.
Конкурсрал давриву гьуртту хьунни ДР-лул КIулшиву дулаврил министерствалул хъунмур пишакар, райондалул куратор Кинаят Юнусова.
Дуклаки оьрчIал давурттан кьимат бишлай бия ларгсса шиналсса конкурсрай хьхьичIунсса кIанттурду бувгьуми.
ХьхьичIунсса давуртту дия Щардал, ГьунчIукьатIрал, Хьур­ттал, ЧIурттащиял, ЧIарттал, Гъумучиял, Ккурккуллал, ШавкIуллал, КIундиннал школарттал дуклаки оьрчIал.
Конкурсрал ахирданий Кинаят Юнусовал кIицI ларгуна гьуртту хъанахъиминнал ларайсса хIадуршинна. Хаснура цIа дуруна Щардал школалул 3-мур класс­рал дуклаки душ Ибрагьимовал ва КIундиннал школалул 3-мур класс­рал дуклаки душ Ибрагьимова Иладал давурттая.
Ххув хьуми барчагу бувну, бахшишру дуллуна КIулшиву дулаврил управлениялул каялувчи Явсупи ХIамзаевлул. Ва конкурс шамилчинни райондалий буллалисса. Гьарца шинал райондалул дуклаки оьрчIал хьхьичIунсса кIанттурду бугьайссар республикалул конкурсирдайгу. Ахттаршиннардаха зун гъира бусса мюрщултгу шиная шинайн чIяву хъанай бур.