Интнил хьхьунил байран дур жула Дагъусттаннал халкьуннал яла ххирамур, ляличIинура кIицI лагаймур байран. ТIабиаьт дахьра чантI кусса, къурнил давуртту дайдишайсса гьантрай, интнил кьинигу, хьхьугу архIал дарцIусса март зурул 22-нния байбивхьуну, 3 гьантлий кIицI лагайссар ххаллилсса интнил байран жула лакрал. Аьвзал заманная шихунмай байбивхьуну, хIакьинусса кьининингу яхьуну дур ва байрандалуцIун дархIусса аьдатру: къавтIи бичаву, авадансса, аслийсса лакку дукрардал ссупра тIитIаву, бартри даву.
Шяраваллаву зурул хьхьичIва байбишайссия ца кулпат кунма ва байрандалийн хIадур хъанай. Буллугъсса, авадансса ссупрарду тIитIайсса бивкIссар, шин авадан­сса, бакIлахъия дусса, барачатсса хьуншиврул. ХьхьичIара жула халкьуннал цIусса шингу ва кьинилия дайдишайсса диркIссар. Шинал дайдихьу цукунсса хьурив, мукун гьантIиссар щалла шингу тIий, хIарачат буллан бикIайсса бивкIссар авадансса ссупра тIивтIуну, тяхъану, ххарину тIайла дуккан. Ва кьининин ниттихъал цалва оьрчIан бартри дайсса диркIссар. Бартригу, цаннаяр ца ялтту буккан хIарачат буллай, гьивхь, ккунук, кишмитIутIи, манпасив рирщуну, чIюлу дурну, бургъил, зурул, ризкьилул, мюрщи оьрчIал лащин дусса дайсса диркIссар.
Мукунна оьрчIал дайсса диркIссар тIурщив, бичайсса бивкIссар щарнил дянивгу, махIла-махIлардайгу цIарал къавтIив. Мюрщи-хъуни къаувкуну, цинявппа къавтIилул ялтту тIанкIа тIун бикIайсса бивкIссар
— Ттул цIуцIаву цIарахьхьун
ЦIуллушиву чурххахьхьун! – тIий, дуаьгу дуллай.
Цалла-цалла бартригу дургьуну, оьрчIру кьатIув буккайсса бивкIссар куннахь кув мяш тIий.
Ва яла ххаллилмур, буллугъмур интнил байран хъуннасса шадлугърай хьунадаркьунни ЦIуминалийсса лакрал щархъавугу. ДакI ххари хъанай дур вай агьали, хьунадакьлакьисса захIматшивурттах къабурувгун, лакрал миллатрал аьдатругу дуручлай, цаннал ца бувгьуну, укунсса тяхъашивуртту, байранну дуллай бушиврия. Гьашинусса жул аьрххигу багьунни ТIюхчардал ва Чапаевкаллал шяраву дуллалисса интнил хьхьунийн. ЦIуминалийн бивзсса агьулданун шяраваллаву цачIун батIлансса, дялахъру, тяхъашиву дансса кIанттурду бакъашиврийн бувну, шийхсса цинярда байранну школардай дувай.

ТIюхчарав
ТIюхчардал шяраву Интнил хьхьунил байран гьашину цалчинни дуллалисса. Школалул залданувун бавтIун бия шяраваллил жямат, лагмасса щархъавасса хъамал. Ва байрандалул кьини цалва жяматран ххаллилсса бахшиш дунни ТIюхчардал шяраваллил администратор Аьли Аьлиевлул. Цалла байрандалул сий гьаз дан, агьали ххари бан ванал бучIан бувну бия Лакрал театрданул артистал. Агьали Интнил хьхьунищал барча буллалисса, миннан тIайлабацIурду чIа тIутIисса ихтилатру бунни Аьли Аьлиевлул ва школалул директор ЩайхахIмад Дадаевлул.
— Гьашину Интнил хьхьунил байран цIуминалийсса ТIюхчардал шяраву цалчинни дуллалисса. Хьуннав ва жул шяраву хъиншивурттал, ххаришивурттал дайдихьуну. Шамийлла мина даххана дан багьсса жул инсантуран, утти вания буттал кIану хьуннав. Жул байран хъун дан бувкIсса цинявппагу хъамаллуралгу, Лакрал театрданул артистуралгу аьрххи ххаришивурттайн бакъа къабагьаннав. ЛяличIинуссава барчаллагь учин ччай ура ва жулла байрандалийн Лакрал театр бучIан бувсса шяраваллил администратор Аьли Аьлиевлухь, ва байрандалийн­сса хIадуршинна дуллай бивкIсса ттулва учительтурахь, — увкунни ЩайхахIмад Дадаевлул.
Гихунмай, цила зумувну, усттарну, тIааьнсса лакку мазрай цIу бусса хъярч-махсарттугу буллай, байрандалул мажлис бачин бувну бия ДР-лул лайкь хьусса артистка Саният Рамазанова. Цалва балайрдах мякь бувксса тамашачитал ххари бунни цинявннангу ххирасса ХIажиаьли ХIажиаьлиевлул, Саният Рамазановал, Луиза Шагьдиловал, Шамсуттин Къаплановлул, Аьбдул Мурадовлул, Ямлихан ХIажиевлул, Юлиана МахIаммадовал, Халисат Батырбековал, Барина Мусаевал, Анисат АьбдуллатIиповал. Саният Рамазановал ва концертрай цалчин увкунни ПатIимат Рамазановал мукъурттийсса буттахасса балай. Хъиннува тяхъа бувккунни тамашачитал сахIналийн ДР-лул лайкь хьусса артистка Луиза Шагьдилова аккордеонгу бишлай бувккукун. Хъамалгу, Лакрал театрданул артисталгу ляличIину ххари хьуна тамашачитураву щяивкIун машгьурсса балайчи Аьлиоьмар Аьлиев ххалшайхту.
Артистурал тяхъасса программа ккаккан дурну махъ, сахIналийн лавхъунни цалва бусса оьрму театрдануву гьан бувсса, театрданул кици хьусса, Дагъусттаннал Халкьуннал артистка тIисса цIа цалва гьунарданийну ва захIматрайну лайкь дурсса Уди Аьлиева, Жинасат ДинмахIаммадова ва Ларина Оьмарова. Вайннал ххари-хъиншивуртту чIа тIутIисса, мяъна-мурад куртIсса дуаьрду дунни шяраваллил жяматраха, цинявппагу лакрал агьулдануха.