ЦIуссалакрал райондалул бакIчи МаматIи ХIамзатовлул ЦIуссалакрал шяравун лавгун хIачIайсса щинал тагьар ххал дунни.

Ванащал бия ЖКХ-лул пишакартал ва райондалул администрациялул архитектуралул отделданул зузалт. Комиссиялул мюрш бивкIун ххал бунни циняв бакIщаращив: шяраваллил жяматрачIан щин нанисса резервуарду, бассейнну, къувирду.

 Ххишаласса къулагъасрайн лавсунни ца-ца кIанттурдай щин дацIлацIаврил масъала. Шиккува ххал бивгьунни тагьар къулай дансса чаранну. Ихтилат бия оборудование цIу дуккан даврия, цIусса бургъурду бишаврия. Ххал диргьунни мукунна чIал къавхьуну асфальт бутIлантIисса кIичIирттавусса щинал сетьрал тагьар. ЧIумуй тагьар кIул даврийну, аьркин дагьлай духьурча коммуникациярду даххана даврийну, ххуллул давуртту нанисса чIумал авариярттая мюхчан хьун бюхъантIиссар.

Ххал бигьавуртту дурну махъ райондалул бакIчинал цаппара тапшуршиннарду дунни. Масала, шяраваллил гьарица кIичIираву ххал бигьавуртту дан ккаккан бунни, щин нанисса кIанттурдай ци диялдакъашивуртту дуссарив кIул бувну, ми дукьан дан­сса чаран лякъин. Му бакъассагу, сакин дан кунни щин дусса къатрал реестр ва ишла ­дуллалисса щинах багьа ласаврил даву.

КIантту-кIанттурдайн лавгун хIачIайсса щинал тагьар ххал даву администрациялул давриву ца хьхьичI ххуттайн лавсъсса масъала бур, цанчирча коммунал структуралул тагьарданийн хъар хъанай бур шяраваллил агьалинал оьрмулул даража.

Андриана Аьбдуллаева