Вай гьантрай МахIачкъалалив хьунни Дагъусттаннайсса «Справедливая Россия» партиялул конференциялул кIилчинмур этап. 

Шикку гьуртту хьунни партиялул председатель, ДР-лул Халкьуннал Мажлисрал председательнал хъиривчу Камил Давдиев, ДР-лул Халкьуннал Мажлисрал депутатътал Мурат Пайзуллаев ва Марат Аьлияров, «Кизлярский электроаппаратный завод» АОА-лул финансирттал директор Имам Рамазанов, Юстициялул министерствалул ва Избирательный комиссиялул вакилтал, журналистътал.
Конференциялул даву дайдихьлай, Камил Давдиевлул балжину бувсунни шинал лажиндарай дурсса даврия ва хьхьичIун лавсъсса мурадирттая. КIицI лавгунни, хъуннасса къулагъасрайн лавсун бушиву хасъсса аьралий операциялул гьурттучитал ва миннал кулпатру. Давдиевлул бувсунни, Аьрасатнал президент Владимир Путиннущал хьусса хьунабакьаврий депутатътурал корпусрал Дагъусттаннал бучIантIимунил цIаний хъуннасса даву дуллай бушиву тасттикь бувшиву.

Дагъусттаннал парламентравун кIанттул отделениярттайсса 54-гу партиялул чулуха 176 кандидатнахлу чIурду буллунни.
Конференциялул делегатътурал кьамул дунни «Региональное отделение Социалистической партии СПРАВЕДЛИВАЯ РОССИЯ в Республике Дагестан» тIисса цIанилусса партиялул тIалавшиннарду цачIун дурсса ва республикалул цIурювкьусса масъалартту дузал баву мурадрайсса маслихIатру бусса бувчIавурттайн хIадур хъанахъисса программа.
Партиялул хьхьичIун ларсъсса сиптардавасса дур агьалинал оьрму бигьа-рахIат баву мурадрайсса программа.
Партиярдаву кIилчинмур ххуттай дусса «Справедливая Россия» партиялул сияхI хъунна хъанай душиврийну исват хъанай бур вайннал хьхьичIун ларсъсса сиптарду дузрайн дуккан дуллай бушиву.

Имара Саидова