Июньдалул 29-30-нний Москавлив хьусса Джиу-Джитсу-Грепплинграл Аьрасатнал чемпионатрай Сиражуттиннул арс Арсен ХIажиевлул ларсун дур Аьрасатнал чемпионнал цIа.

Арсен увну ур 1985 шинал Гъумук, ЧIурттащатусса нитти-буттал къушлий. МахIачкъалалив 8-мур школа къуртал бувну махъ ванал бувккуну бур Халкьуннал хозяйствалул институтрал финансирттал ва кредитрал факультет. Зий ивкIун ур хъунама бухгалтернал къуллугърай. Амма Арсеннул дакI кIункIу тIий диркIун дур медициналувун, духтур шаврил гъира ялтту бувккун, увххун ур Медициналул институтрал стоматологиялул факультетравун. Зий ур стоматолог-инплантантнал пишалий 10 шинал мутталий.
Ванал буттал ппу Сулайман ХIажиевгу хIакинну зий ивкIссар Лакрал территориялул медициналул округрай (ТМО). Га ивкIссар хъун дяъвилул гьурттучи, Италиянал движение-сопротивлениялул гьурттучи. Ганал бусса бур Италиянал компартиялул чулухасса тамансса барчаллагьрал чагъардугу.

Сулайман ХIажиев лайкь хьуну ур Дунияллул халкьуннал дянивсса ЯтIул ххачлил комитетрал Барчаллагьрал чагъарданунгу.
Арсеннул ппу Сиражуттин ХIажиевгу, хIакин-офтольмо­тологри, зий ивкIссар Лакрал райондалул азарханалул хъунама хIакинну. Тания махъ сайки 20 шинал мутталий зий ур Каспийскалийсса Янил микрохирургиялул центрданул отделданул заведующийну. Ва цувагу спортсменни – хьхьичIунсса лачIунуккур, лачIун буккаврил спортрал мастерди.

Арсенгу авчуну ур буттал ва ттаттал ххуллийх, хьуну ур хъинсса хIакин ва цIа дурксса спортсмен. ОьрчIнийва Арсен машхул хьуну ур лачIун уккаврихун, ивну ур Аьрасатнал спортрал мастернал даражалийн. Джиу-Джитсу-Грепплинграл чемпионатрай ххув шаврийну ванан тIивтIуну бур декабрьданий Абу-Дабилий хьунтIисса греппринграл Дунияллул чемпионатрайнсса ххуллу.
Арсеннул махъ буллунни тиха зана хьуну махъгу «Илчилул» редакциялийн хъамалу учIан. ТIайлабацIу хьуннав вин, Арсен!

ХIасан Аьдилов