Октябрьданул 13-нний ЦIуссалакрал райондалул администрациялий хьунни, Дагъусттаннал Республика хьхьичIуннай даву мурадрай, Республикалул БакIчинал кьамул дурсса приоритетсса проектру иширайну щаллу даврил хIакъиравусса тагьар ххалдигьлагьисса совещание.
Шикку гьуртту хьунни ЦIуссалакрал райондалул администрациялул бакIчинал цалчинма хъиривчу Аьвдурашид Буттаев, администрациялул бакIчинал хъиривчу Земфира Джержисова ва шяраваллал администрациярдал хъуними. Земфира Джержисовал цилва ихтилатраву кIицI лавгунни Дагъусттаннал президент Рамазан АьбдуллатIиповлул кьамул дурсса 10 приоритетсса проектирдава «Обеление экономики» тIимур проект ца яла агьаммур душиву. Бувсунни мукунма ва проектрал лагрулуву дуван ккаккан дурсса давурттал план душиву ва циняв каялувчитал му пландалущал кIул бувну цачIуну зузишиву. Шикку гьуртту хьуминнахь ванил ялагу бувсунни октябрь зурул 8-нний Къизлардай хьусса совещаниялий дуршиву 9 зурул мутталий приоритетсса проектру лядуккаву мурадрай дурсса даврил хIасиллу. Му совещаниялий шяраваллал бакIчитурангу шинал ахир хьуннин ккаккан дурну дуссар дансса давуртту.
Шиккува кIицI лаган, Джержисовал баян бунни 2012 шинал январьданул 1-ннийн бияннинсса къатрал технический паспортру буминнаща ва 2001 шинайн бияннин аьрщи ишла дан ихтияр думиннаща бюхъантIишиву ва шинал ахирданийннин цалла къатри ва аьрщи 500 къуруш дуллуну цайра дацIан дурсса документ ласун. Совещаниялий ихтилатру хьунни инвестициярдал хIакъиравуссагу. ХIакьинусса кьини райондалий иширайну дачин дурну дуссар 2 инвестициялул проект: СПК «Нива» ва муххал конструкциярду дуллалисса завод.
Ялагу ихтилатру хьунни Дагъусттан Республика хьхьичIуннай даву мурадрай кьамул дурсса цаймигу приоритетсса проектирдая ва миннул хIакъираву райондалий дуллалисса давурттая.
Совещаниялул даврил ахирданий вай давурттаха зузиминнайн тапшур бунни цаппара жаваблувсса бигардал ялув бавцIуну, ми биттур бан.
