Февраль зурул 25-нний ЦIуссалакрал райондалийн бувкIунни Аьрасатнал ПаччахIлугърал Думалул депутат Аьвдулмажид МахIрамов бакIчисса делегация. Делегациялуву бия Дагъусттаннал БакIчинал вакил Аьлибек Аьлиев, ДР-лул БакIчинал ва ХIукуматрал администрациялул агьалинащалсса даврил отделданул хъунама Мурад Аьлиев.
Делегация райондалийн бучIаврил мурад бия аьмну райондалийсса ва такну личIи-личIисса идарарттайсса масъаларттащалсса кIул шаву. Бусравсса хъамал хьунабавкьунни ЦIуссалакрал райондалул БакIчи ХIажи Айдиевлул, ДР-лул Халкьуннал Мажлисрал депутат Амирхан Амирхановлул, ЦIуссалакрал райондалул азарханалул хъунмур хIакин Людмила Султановал, Хасавюртливсса кулпатрал цIуллу-сагъшиву дуруччаврил ва репродукциялул районнал дянивсса центрданул хъунама хIакин Зайнулла Мирзоевлул. Хъамаллуран ккаккан бунни райондалул азархана ва поликлиника, бувцунни къашайшалт бусса палатардавун.
Азархана ва поликлиника ххал бувну махъ делегация хьунабавкьунни шикку зузиминнащал, ххал бивгьунни райондалий агьалинал цIуллу-сагъшиву дуруччаврил масъала. Азарханалул каялувчитурал тавакъю бунни хъамаллурахь цивппа ттизаманнул технологиялул дузал бан кабакьу бувара куну. Аьвдулмажид МахIрамовлул махъ буллунни шайсса кумаг бан. Ва хьунабакьаврийнгу депутат ачIа къаувкIунни. Ванал бахшиш дунни азарханалун цаппара аьркин шайсса материаллу.
Шичча бувккун махъ делегация хьунабавкьунни райондалул агьалинащал. Цала-цала масъаларттая бусан бувкIун бия бугьарами ва жагьилми. ЧIявуминнал буруккин бия бизан баврил масъалалуцIун бавхIусса. Цинявннах вичIигу дирхьуну, депутатътурал махъ буллунни гьаз хьусса масъаларттал хъирив буккансса ва миннул хIакъираву жавабру чичинсса.
