2002 шиная шихунмай Лакрал райондалий аьдатравун багьну бур интеллектуал тIуркIу «Брейн-ринг». Мунил сакиншинначитал бур райондалул администрациялул ОьрчIащалсса ва жагьилтуращалсса даврил ва туризмалул отдел, КIулшиву дулаврил управление ва Магьирлугърал къатта.
Лакрал райондалул «Гъази-Гъумучи» команда сайки гьарца шинал гьуртту шайссар республикалул тIуркIулийгу.
«Брейн-ринг» тIуркIулул сий райондалий лапра хъунна хъанай дайдирхьунни республика хьхьичIуннай дансса ДР-лул БакIчинал хьхьичIунсса ххуллурдавасса «Человеческий капитал» проект райондалий зузи байхту.
Вай гьантрай Гъумучиял клубраву хьунни Лакрал, Ккуллал, Ахъушиял, Лаващиял, Ххунзахъиял районнал командарттал дянивсса тIуркIу. ТIивтIунни тIуркIу райондалул оьрчIащалсса ва жагьилтуращалсса даврил отделданул хъунама МахIаммад Гадаевлул. Гьуртту хъанахъиминнан тIайлабацIу чIа тIисса ихтилатру бунни Лакрал райондалул бакIчинал цалчинма хъиривчу Абакар Къюннуевлул ва «ДагПатриотЦентр» ГКУ-лул директор ХIамзат Муслимовлул. Ванал бувсунни ххув хьусса ва хьхьичIунсса кIанттурду бувгьусса командартту гьуртту хьунтIишиву МахIачкъалалив хьунтIисса республикалул финалданий.
