Ларгсса шинал хъунмасса аваза сукку хьуссия Гъумучиял бярнил ялув. «Ханнал бяр оьрватIал мина хьуну бур, щарай бур, муних ургайсса акъар», — тIий соцсетирдавугу чичлай, бярнил лултту чулийсса ттучаннавун, кафердавун щин экьинай дур тIий, миннул заллухъругу аьрзирдай бувккукун, райондалул администрациялул бувну бия бяр цIубуккан бансса проект.
Му проектгу бивхьуну бия фейсбукраву, агьалинал цалва-цалва пикрирду бусаншиврул. Амма ххуймунивугу оьккимур чIалачIими, ккунукраву чIара ляхълакъими гьарза хъанай бур махъ зуманив. Фейсбукравусса чIявуми пикрирдугу бия «бяр бакьин буллалиссару тIий, райондалул каялувчитуран цанна хайрданунсса бизнес-проект дуллай бур» тIисса. Мунил ялувсса дискуссия дуссия «Илчи» кказитрайгу.
Райондалул бакIчи Юсуп МахIаммадовлул ва му даврил хъунмур хъар цайнна ларсъсса Ссапар Аьбдуллаевлул бувсуна му цукунчIавсса бизнес-проект дакъашиву, КIикку, анжагъ, щин экьинанисса кIанттурдугу бавщуну, бярнил ккурккайхсса ххялчIан бавкьусса ххуллугу бакьин бувну, мурхьругу бувгьуну, лагма чапар дан дакIний бушиву.
Муния мукьах дукIу гъинттул кIилва марцI бунни бяр. Амма гъараллу сававгу даву лахъи лаглай дия. Гьашину гъинттулгу багьунни бяр цIуницIа марцI бан — кIива буккан бунни шанттуршунничIан бивсса камазру кьюнурал. Вана ахиргу кIикку зий байбивхьуну бур усттартал. Щин экьинанисса кIанттурдугу башлай, бярнил лагмасса ккурккайх бутIлай бур цемент. Даву цуксса лахъи лаганссарив усттартуран цанмавагу къакIулли, цанчирча зунттавусса давурттахун ччя-ччяни дахчай тIабиаьтрал шартIру.
Амма дуллалимур чулийн къадурккуну къадикIай.
