Ккуллал райондалий Ххувшаву ларсун 70 шин шаврин хас дурсса цикссагу давуртту дуллай бур. Миннувасса ца дур эстафеталул журалий «Аьпалул лу» ца шяраваллил гамур шяравун биян буллалисса хьунабакьавуртту. Апрельданул 16-нний Къяннал шяраваллил вакилтал бувкIун бия му Лу тапшур буван Ссухъиящиял шяраваллийн.
Ссухъиящиял шяраву халкь чанну яхъанай бур. ХIакьинусса кьини махъсса переписьрайн бувну шикку яхъанай ур 265 инсан. Ва шяравалу духлахиссар Вихьуллал шяраваллищал цачIусса кIанттул сакиншиннаравун. Амма ци чансса инсантал яхъанахъисса шяравалу духьурчагу, дяъвилийн лавгун ур 33 адамина. Зана хьуну ур вайннавату увагу 7 саллатI. КIицI дуванну вай дакIру чумартсса зунттал чиваркIуннал цIарду, зунттал халкьуннан дяъвилул кIурал, янсаврал кьанкь тачIав къарищуншиврул талай бивкIун тIий: ХI. Аьлиев, М. ХIажиев, И. ХIусайханов, Б. Баширов, Кь. Жабраилов, Кь. Рамазанов, Кь. Рамазанов, Р. Ибрагьимов, М. Ибрагьимов, Оь. МухIуттинов, Аь. МахIадов, С. СалихIов, ХI. Сяидов, Щ. МахIаммадов, М. МахIаммадов, М. Миллатуллаев, С. Амирханов, И. ХIамзаев, А. ХIусманов, ХI. Мизаев, И. МахIаммадов, Къ. Маллаев, М. Маллаев, А. Рамазанов, С. Сулайманов, С-А. Сулайманов, С. Кьурбанов, М. ХIадисов, Н. МахIаммадов, Къ. Суллаев, М. Ххиппиев, Аь. Щейхов, ХI. Щаллаев.
Вайннавату Ххувшаву ларсун зана хьуну бур: МахIаммадов МахIаммад, Баширов БатIалав, Маллаев Мудун, Саидов ХIусбан-Кьади, Миллатуллаев МахIаммад, Щаллаев ХIажимари, Аьбдуллаев МутIалли.
Дяъвилуву гьуртту хьун лавгми бакъа, къанаврттайн лавгун ур 20 инсан.
Яла агьаммур ва дакIний личIанмур даву хьуна шяраваллил клубрал сахIналий. Шикку куннайн кув лажинну бавцIуну бия Къяннал шяраваллил школалул ва Ссухъиящиял цачIава шяраву ва Вихьуллал шяравусса школалий дуклакисса оьрчIру. Вай цивппагу чIюлусса яннардаву бия. Оьрус ва лакку мазурдий дяъвилул иширттан хас бувсса шеърирду бувккуна оьрчIал хъинну бюхханну. Залдануву щябивкIсса тамашачитал аьтIутIи бувуна Къяннал школалул дуклаки душ Агъаева Гуланнул. Ва хIадурнувасса артистка бия. Лакрал драмтеарданул бучIия ва душних къулагъас дарча. Ихтилатру хьуна Хъун дяъвилуву дурсса чувшиврияту, уттисса жула Аьрасатнал лагма хъанахъисса дандибацIавурттая ва Ватан ххирану ялун нанисса ник тарбия даврия. Махъру лавхъунни Ккуллал райондалул бакIчинал пресс-секретарь Хизриев Шамххаллул, райондалул бакIчинал хъиривчу ХIажиев Эдуардлул, Къяннал шяраваллил бакIчи ХIажимахIаммадов Маликлул, Ссухъиящиял школалул учительтал Исмаева КьурбанпатIимал, НикIаева Асиятлул, Вихьуллал ва Ссухъиящиял шяраваллал цачIусса администрациялул бакIчи ХIусайнов МахIаммадлул, Вихьуллал школалул учитель МутIаллиев МутIаллил.
Ва давривух гьуртту хьун бувкIун бия, мукунма, Ккуллал райондалул музейрал директор Абакаров ТIагьир, Соцзащиталул бакIчи Гъазиев Жамбулат, Культуралул управлениялул хъунмур Ибрагьимова Марина, Ветерантурал советрал председатель Загьидиев Аьбдул, хъанахъимур ласлай бия райондалул «Щунудагъ» телевидениялул зузалт.
Аьпалул луттиращал архIал шяраваллин тапшур буллай бия, шиккува мудан бикIантIисса, Берлиннай бивщусса ттугълил щялу бакъасса копия.
Хъамаллуран Ссухъиящиял шяраваллил тIивтIуну бия ххуйсса ссупрагу.
