ДГПУ-рал дагъусттаннал филологиялул факультетрай хьунни Дагъусттаннал халкьуннал этнокультура ва ниттил мазру ябаврил ва хьхьичIунмай баврил суаллу ххал бигьлагьисса хьунабакьаву.
Миннацрал пресс-службалий баян бувсса куццуй, ва хьунабакьаву дансса пикри хьуну бур Аьрасатнал КIулшиву дулаврил министерствалул инновацион курсрай Аьрасатнал халкьуннал литература ва магьирлугъ хьхьичIуннай дан багьлай бушиврул ялувсса министр Сергей Кравцовлул бувсса ихтилатрая махъ.
Ва агьамсса масъала ххалбигьин ва ми щаллу баврил ялув цала маслихIатру бусан бувкIун бия ДР-лул миллатирттал политикалул ва диннал иширттал министр Энрик Муслимов, ДГПУ-рал ректор Нариман Асваров, проректор Руслан Гереев ва цаймигу.
Хьунабакьаврий хьхьичIун лавсунни ниттил мазру хьхьичIунмай бансса площадкану ДГПУ-рал дагъусттаннал филологиялул факультет хьун аьркиншиврул ялув ДР-лул Миллатирттал политикалул ва диннал иширттал министерствалул ДГПУ-ращал кьутIи чичинсса сипта.
ХьхьичIун ларсунни мукунна ниттил мазру лахьлан жагьилтал кIункIу бансса, хасъсса субтитрардащал Дагъусттаннал халкьуннал мазурдийсса мультфильмру дансса, дунияллул литературалул классикалул произведенияртту миллатирттал мазурдийн таржума буллансса, шяраваллал ва шагьрурдал школарттан мазру лахьлансса концепциярду сакин дансса маслихIатру.
Министрнал хъинчулий ккавккунни студентътурал сиптарду ва маслихIат бунни ведомствалул грантирдайнсса проектру буллан ва мукунма Дагъусттаннал миллатирттал мазру ва магьирлугъ лахьхьавриву паччахIлугърал органнал потенциал ишла буллан.
