Вай гьантрай ПаччахIлугърал Кремлилул Дворецраву Аьрасатнал Финансирттал министр Антон Силуановлул дипломру тапшур бунни Аьрасатнал Федерациялул ХIукуматрацIунсса Финансирттал университет къуртал бувсса выпускниктуран.

Дипломру тапшур буллали­сса кьини Кремлилул Дворецравун бувкIун бия университетрал каялувчитурал чулухасса вакилтал, преподавательтал, выпускниктал ва миннал нину-ппу.
Ва университетрал финансирттал ва экономикалул факультет ЯтIул дипломращал къуртал бунни жулва лакку душ, Хъусращиял шяравасса Кубачанов МахIаммалул душ Алинал.
ЦIусса Уренгойрай мусил медальданущал школагу къуртал бувну, дуклан бувххун бур Алина Аьрасатнал финансир­ттал университетравун. Университетраву хьхьичIунну дуклай, лайкь хьуну бур ректорнал чулухасса Барчаллагьрал чагъарданун, ласлай бивкIун бур цIакусса стипендия.|

КIулшивуртту дулаврил чулухуннай хъунисса тIалавшиннарду дусса Аьрасатнал Финансирттал университетраву дуклай бивкIсса цинявппагу выпускниктал бур оьрмулул опыт бусса, хьхьичIунсса пишакартурал даражалийсса. Пахру бан лайкьсса зат бур укунсса даражалул вуз хьхьичIунсса хIасиллащал жула душнилгу къуртал баву.

– Университетраву дуклай бивкIсса шиннардий лав­хьхьунни ттун хьхьичI бивхьу­сса пикри-хияллу бартлаган буллан, иш багьсса кIанттурдай тIайласса хIукмурду буллан. БувчIунни, ччан бикIарчан, инсаннаща дан къабюхъай­сса цичIар дакъашиву. Ши­кку ларсъсса кIулшивуртту ва насихIатру хьунни оьрмулухун­сса дарсруну. Жухь дарсру дихьлай бия яла цIанихми преподавательтал. Жул студентъсса оьр­мугу бия хъамакъабитан­сса. КIюрххил лекциярттай, семинардай, ахттая махъ совещаниярттай, цIанихсса спикертурал конференциярттайн занай, бацIансса минут къадикIайва. Шикку дуклакисса шинну дия оьрмулуву яла яргми,– тIий бур Алина.
Вуз къуртал бувсса цинявппагу выпускниктуравух Алинагу тIалав бунни хьхьичIунсса предприятиялий зун.
ЧIа учинну Алинан гихунмайсса оьрмулуву ва давриву хъунисса тIайлабацIуртту!