Августрал 3-нний ДР-лул ХIукуматрал председательнал хъиривчу Мурад Казиев къуллугърал аьрххилий увкIунни Лакрал райондалийн, кIул хьунни медициналул идарарттал иширттащал ва Агьалинал социал масъалартту бартбигьайсса центрданул давурттащал.
ДР-лул цIуллушиву дуруччаврил министрнал хъиривчу Салман АхIмадовлущал, райондалул бакIчи Юсуп МахIаммадовлущал, ЦРБ-лул хъунама хIакин АьбдурахIим Дибировлущал архIал ххал бивгьунни цIусса ФАП-ру Хьурттал ва Щардал шяраваллаву. ХIакьинусса кьини вай бувну бартлагавай бур, так лирчIун дур духлаган дуван ДР-лул ЦIуллушиву дуруччаврил министерствалул ялун личин дурсса цаппара диялдакъашивуртту.
Яла Мурад Казиев ивунни Лакрал райондалул азарханалийн. Вице- премьер кIул хьунни фтизиатр МахIаммад Айгуновлущал. Ва зий ур шикку 63 шинал мутталий. ЦIана духтурнан дур 89 шин. Премьер-министрнал ЦIуллушиву дуруччаврил министерствалийн тапшур бунни МахIаммад Айгунович ккаккан уван республикалул даражалийсса наградалун.
Муния махъ делегация бивунни Гъумук цIусса азархана буллалисса кIанайн. Ва бур буллай бачIину ливчIун бивкIсса объект, ва бакIуйн буккан баврих хъуннасса къулагъас дуллай бур. Мурад Казиевлул тапшур бунни объект ччясса мутталий къуртал буван.
Райондалий ххал бивгьунни мукунма ЦСОН-далул райондалул отделение, кIул хьунни мунил давурттащал. Мурад Казиевлул тIимунийну, социал хIаллихшинну даврил масъала ляличIисса контрольданий бур республикалул каялувчиначIа. Мунияту аьркинну бур социал хIаллихшинну цила чIумал ва лавайсса даражалий дуллан.
