МахIачкъалалив Росгвардиялул соединениялул базалий лахъа-хъунну хьунабавкьунни Украиннаву хасъсса операциялий гьуртту хъанай бивкIсса Росгвардиялул зузалт. Вай хьунабакьин бувкIун бия соединениялул командирнан кIанайсса полковник Василий Липатов, росгвардиялул зузалт, аьралитурал гьалмахтал ва гъан-маччами. – Командованиялул чулуха на барчаллагь тIий ура зухь, къуллугърал бурж лайкьну бартбивгьуну тIий. Зува къуллугъ буллалисса кIанттурдай паракьатсса оьрму дузал бан зу шаймур бувссар. Ккаккан бувссар зула яхIгу, къучагъшивугу, – увкунни Василий Липатовлул. Ванал бувсунни чIявуми аьралитуран паччахIлугърал наградартту дулунтIишиву.
Хъирив аьралитал хьунабавкьунни нитти-буттащал, гъан-маччанащал. Аьралитуран ххаллилсса программа ккаккан дунни МахIачкъалаллал соединениялул оркестрданул.
Базалул хIаятраву тIивтIуну бия аьралитуран ва хъамаллуран «авлахърал кухня».