Жаруллагьлул арс Керимов ХIажи
Уттигъанну оьрмулул 64 шинаву, цIуцIишаний лахъи къалавгун, ахиратрал хьунни ххаллилсса зунттал чув Керимов ХIажи.
Увну ур ХIажи УзбакIнаву Вабкент шяраву ГьунчIукьатIатусса Жаруллагьлул ва Розал кулпатраву. Дянивмур даражалул школагу Бухаралив къуртал бувну, 1976-ку шинал, кулпатращал бивзун бур МахIачкъалалив. ЗахIматрал ххуллу байбивхьуну бур Приборду дайсса заводрай слесарь-сборщикну зий.
1977-ку шинал увххун ур ДГПУ-лул тарихрал ва английский мазурдил факультетрайн, 1982-ку шинал ххуйну къуртал бувну бур. Аьрали бурж лавхъун бур Авгъаннал дазуй. 1984-1986-ку шиннардий зий ивкIун ур ДГПИ-лул тарихрал факультетрай преподавательну. Цалла ларсъсса кIулшивурттай гьашиву къадурну, лавхьхьуну бур испаннал мазгу.
1986-1989-ку шиннардий дуклай ивкIун ур Москавлив аспирантуралуву.
ХIукуматрай дахханашивуртту хъанан диркIувкун, Москавлив коммерциялул давурттай ишбажаранчину зий ивкIун ур.
ХIажи уссия хъиншиврул бутIа ххишалану буллусса, лагма-ялттунащал хIал бавкьусса, инсаннал чIарав ацIан, ка-кумаг бан хIадурсса, дугърисса чув.
Цала бугьарасса нитти-буттаха аякьалий икIайссия. Ххирассия буттал шяравалу ГьунчIукьатIи, ччя-ччяни ияйссия Лаккуйнгу, цIу дуккан дуллай уссия буттал къатригу.
ХIажи аьпалул хьусса хъуннасса кьурчIишиву кIидачIлай, жижара буллай буру уссихь, ссурваврахь, гъан-маччанахь цинявннахьвагу.
Цал гьав нурданул дуцIиннав, алжаннул ххари аннав. Махънал оьрмурдай барачат бишиннав.
ГьунчIукьатIрал жяматрал цIания ХIусайнов ХIажибутта
ХанмахIаммадлул арс ХанмахIаммадов СултанмахIаммад
Оьрмулул 68 шинаву хар-хавар бакъа аьпалухьхьун лавгунни Карашрал шяраватусса ХанмахIаммадлул арс ХанмахIаммадов СултанмахIаммад.
Ва ия бусса оьрмулий цала буттал шяраву яхъанахъисса хIакьсса зунтталчу, захIматрая нигьа къаусайсса зузала, ризкьичи.
СултанмахIаммад увссар 1953-ку шинал Карашрал шяраву, чIявусса оьрчIру бусса ХанмахIаммадлул ва ПатIиматлул кулпатраву. Буттал шяраву школа бувккуну махъ, ванал бувккуссар цал трактористнал яла щупирнал курсру. Му пишалий зийгу ивкIссар диялсса шиннардий К. Маркслул цIанийсса колхозраву. Мудангу чялишну гьуртту шайссия цала жяматрайн багьайсса аьмсса иширттавух. Ва итххявхсса ия балай учаврил ва музыка бищаврил чулухатугу.
СултанмахIаммадлул бивкIулул пашманшивугу кIидачIлай, дакIнийхтунусса жижара буллай буру ванал кулпатрахь, арсваврахь, душваврахь, уссур-ссуннахь ва махъсса цинявппагу гъан-маччаминнахь.
Цал бунагьирттал аьпа баннав, рухI паракьатний дишиннав.
Карашрал жямат
ЧIяйннал Зайнавлул аьпалун
Ккур куну ларгунни,
Ца шингу чIарах,
Ина бакъа жущал,
Жул ххира Зайнав.
ДакIниймур даиман
Буссара ина,
Хъама итайссарив,
Хъуншиврул инсан.
Жу дакIнийн бутанну,
Ина бувт оьрму,
КIул хьунгу къадиртун,
ДакIнийсса дардру.
Вилами дардругу,
Тийннай дирхьуну,
Ина рахIат дайва,
Цайминнал къюву.
Гьарца мачча-гъаннан,
Шяравуминнан,
Буссияв бусравну
Ина муданмагу.
Дахьва кулпатрая,
Тирхханну шайни,
Лавмартсса бивкIулул,
Жуща зевххунна.
Алжан чанна лавхъссар,
Ина бувххукун.
Вив лавсухьунссара
КIулциринналгу.
Шанашу рахIатну
Абадул шаний,
Ша ласлай кьянкьану
Буру жу вихлу.
ДуркIунни зунттавун,
Щюллисса гъигу,
Ваксса ххуйсса гьантрай
Ина зевххусса.
Я гъинттул, я кIинттул,
Я дяркъу ссуттил,
Чан къашай вил гьаттай,
ЯтIулсса тIутIив.
Саэд ва Камилат АьбдурахIмановхъул
ДухIан къашайсса кьурчIишивугу кIидачIлай, дакIнийхтунусса жижара буллай буру «Илчи» кказитрал корреспондент, Лакрал театрданул пресс-службалул зузала
Тахакьаева Зулайхатлухь,
ххирасса ссил оьрчI аьпалул шаврийн бувну.
Лакрал театрданул коллектив
